लाचखोर तलाठी एसीबीच्या जाळ्यात

३१00 रुपयांची लाच घेताना तलाठी व त्याच्या भावाला लाचलुचपत विभागाच्या पथकाने रंगेहात पकडले.

वाशिम: सात- बारा देण्यासाठी ३१00 रुपयांची लाच घेताना तलाठी व त्याच्या भावाला लाचलुचपत विभागाच्या पथकाने रंगेहात पकडले. ही घटना ७ ऑक्टोबर रोजी सकाळी ११ वाजता रिसोड तालुक्यातील केनवड बस स्थानकावर घडली. रिसोड तहसील अंतर्गत येणार्‍या कळमगव्हाण साजामधील नंधाना येथे विनोद महेंद्रकुमार वर्मा तलाठी म्हणून कर्तव्यावर आहेत. वर्मा यांच्याकडे तक्रारदाराने पत्नी व मुलाच्या नावे केलेल्या शेतीची फेरफार रजिस्टरला नोंद घेऊन सात-बाराची रीतसर मागणी केली. यावेळी तलाठी वर्मा याने तक्रारदाराला मनोज महेंद्रकुमार वर्मा (तलाठय़ाचा लहान भाऊ) याला भेटण्यास सांगितले. तक्रारदाराने मनोज वर्मा याची भेट घेतली असता, सात-बारा देण्यासाठी ३१00 रुपयांची मागणी त्याने केली. याबाबत तक्रारदाराने वाशिम येथील लाचलुचपत प्रतिबंधक विभागाकडे रीतसर तक्रार केली. या तक्रारीच्या आधारे पडताळणी करून ७ ऑक्टोबर रोजी केनवड येथील गजानन हॉटेलच्या परिसरात एसीबीचे पोलीस निरीक्षक एन.बी. बोर्‍हाडे व त्यांच्या पथकाने सापळा रचला. ठरल्याप्रमाणे तलाठी वर्मा याने त्याचा भाऊ मनोज यास तक्रारदाराकडून पैसे घेण्यासाठी पाठविले. बसस्थानकाजवळ ३१00 रुपयांची लाच घेताना एसीबीच्या पथकाने त्याला रंगेहात पकडले.