कारच्या धडकेत दुचाकीस्वार ठार

कारने दिलेल्या धडकेत दुचाकीस्वार ठार तर दोन जण जखमी.

कामरगाव (वाशिम), दि. २0- कारने दिलेल्या धडकेत दुचाकीस्वार ठार तर दोन जण जखमी झाल्याची घटना कामरगाव येथे २0 जानेवारीला दुपारच्या सुमारास घडली. सुनील श्रीराम चोरपगार रा.कान्हेरी सरप, जि.अकोला असे मृताचे नाव असून, यात पत्नी रेश्मा चोरपगार व मुलगा सोहम हे दोघे गंभीर जखमी झाले.एम.एच ३0 एजी ७५४४ या क्रमांकाच्या दुचाकीने सुनील चोरपगार हे पत्नी व मुलासह कामरगाव मार्गावरून जात होते. दरम्यान विरुद्ध दिशेने येणार्‍या एम.एच.२७ बी.ई. ९२१६ क्रमाकांच्या कारने समोरासमोर धडक दिल्याने सुनील चोरपगार हे जागीच ठार झाले. पत्नी रेश्मा (२५) व मुलगा सोहम हे दोघेही गंभीर जखमी झाले. रेश्मा यांना जास्त मार लागल्याने त्यांना पुढील उपचारार्थ अमरावती येथे हलविण्यात आले. कुणीही नातेवाईक जवळ नसल्याने मुलगा सोहम याला कामरगाव येथील संदीप गावंडे यांनी आपल्या घरी पोलिसांच्या संमतीने नेले. घटनास्थळावरुन पळून जाण्याचा प्रयत्न करीत असलेला कारचालक गौरव प्रकाश थोराईत याला शेतात काम करीत असलेल्या मजुरांनी अडवून पोलिसांच्या स्वाधीन केले.