सायकल दुकानाला भीषण आग!

लाखोंचे नुकसान; पाटणी चौकातील घटना

वाशिम : येथील पाटणी चौकात असलेल्या रोहित सायकल स्टोअर्स दुकानाला गुरुवारी रात्री १0 वाजताच्या सुमारास भीषण आग लागली. या घटनेत दुकानातील सर्व साहित्य जळून लाखो रुपयांचे नुकसान झाले.वाशिम येथील पाटणी चौकात रोहित चांदवाणी यांचे रोहित सायकल स्टोअर्स नावाचे सायकल विक्री आणि दुरुस्तीचे मोठे दुकान आहे. गुरुवारी रात्री १0 वाजताच्या सुमारास शिंदे दुकान बंद करून घरी गेल्यानंतर थोड्याच वेळाने आग लागली. थोड्याच वेळात या आगीने भीषण रूप धारण केले. या घटनेची माहिती मिळताच शहर पोलीस स्टेशनचे ठाणेदार कदम घटनास्थळी दाखल झाले. आगीवर नियंत्रण मिळविण्यासाठी नगरपालिकेच्या अग्निशमन दलास पाचारण करण्यात आले. यावेळी नगरपालिकेचे अध्यक्ष अशोक हेडा हेसुद्धा घटनास्थळावर दाखल झाले. अग्निशमन दलाच्या तीन गाड्या घटनास्थळावर दाखल झाल्या आणि जवळपास दीड तासांच्या प्रयत्नानंतर या आगीवर नियंत्रण मिळविण्यात यश आले. या आगीत कोणतीही जीवित हानी झाली नसली, तरी या घटनेत दुकानदाराचे लाखो रुपयांचे नुकसान झाल्याचा प्राथमिक अंदाज वर्तविण्यात येत आहे. आग कशामुळे लागली, त्याचे नेमके कारण कळू शकले नाही. दरम्यान, या प्रकरणी शहर पोलिसांनी स्थानिकांच्या मदतीने अथक प्रयत्न करून अग्निशमन दलास ही आग आटोक्यात आणण्यास सहकार्य केले.या घटनेची नोंद पोलिसांनी घेतली असून, या प्रकरणी संपूर्ण तपासानंतरच आग लागण्याचे कारण कळू शकणार असल्याचे पोलिसांच्यावतीने सांगण्यात आले. आग एवढी भीषण होती, की या दुकानाला लागून असलेल्या मोबाइलच्या दुकानालाही आग लागून मोठे नुकसान झाले. या प्रकरणी वाशिम शहर पोलीस अधिक तपास करीत आहेत.