वाशिम : संत निरंकारी मिशनच्या प्रमुख सुदिक्षा हरदेव यांनी शहरी वृक्षसमूह योजना देशभर कार्यान्वित केली. पर्यावरण समृद्धीसाठी या योजनेचा मोठा लाभ होणार आहे, अशी माहिती संत निरंकारी मिशनच्या औरंगाबाद विभागाचे झोनल इन्चार्ज कन्हैय्यालाल डेबरा यांनी दिली.
स्थानिक जिल्हाधिकारी कार्यालय परिसरात सुरू असलेल्या वन-नेस-वन शहरी वृक्ष समूह योजना प्रकल्पास कन्हैय्यालाल यांनी सोमवारी भेट देऊन पाहणी केली. यावेळी जिल्हाधिकारी कार्यालयाच्यावतीने कर्मचारी गोरख इढोळे यांनी त्यांचा पुष्पगुच्छ देऊन सत्कार केला.
संत निरंकारी मिशन वाशिम शाखेतर्फे जिल्हाधिकारी कार्यालय परिसरात २० गुंठे जागेवर वृक्षलागवडीची मोहिम निरंकारी सेवादलाने हाती घेतली आहे. त्यासाठी जिल्हाधिकारी शन्मुगराजन एस., निवासी उपजिल्हाधिकारी शैलेश हिंगे यांनी जागा उपलब्ध करून दिली. त्यामुळे कार्याला बळ मिळाल्याचे कन्हैय्यालाल म्हणाले.
यावेळी सेवादलाचे वाशिम जिल्हाप्रमुख दत्तात्रय बंडेवार, माधवराव अंभोरे, शहरी वृक्ष समूह प्रकल्पाचे प्रमुख जनार्दन बोरकर, संतोष खोडे, सुनील बोरकर, महादेव इंगोले, माणिक राठोड, संजय काळे, दिलीप व्यवहारे, नीलेश मेवाळ, सचिन सोनुने आदींची उपस्थिती होती.