रिसोडात दुपारी शुकशुकाट

जिल्ह्यात कोरोना विषाणू संसर्गाचा प्रादुर्भाव वाढत आहे. संचारबंदी लागू असतानाही, अनेक नागरिक विनाकारण रस्त्यावर फिरत असल्याने परिस्थिती जैसे थे होती. जिल्हा प्रशासनाने १८ एप्रिल रोजी कठोर पाऊल उचलत संचारबंदीच्या नियमात बदल करीत सुधारित आदेश जारी केला. या आदेशानुसार मेडिकल व दवाखाने वगळता अत्यावश्यक सेवेतील उर्वरित सर्व दुकाने सकाळी ९ ते दुपारी १ या वेळेत केवळ चार तासांसाठी सुरू ठेवता येणार होती. मात्र, राज्य शासनाने सुधारित आदेश जारी करून दवाखाने, मेडिकल्स वगळता उर्वरित अत्यावश्यक सेवेतील दुकाने सकाळी ७ ते ११ या वेळेत सुरू ठेवण्याचे निर्देश दिले. त्यानुसार जिल्हाधिकारी शण्मुगराजन एस. यांनी मंगळवार, २० एप्रिल रोजी संचारबंदीचा आणखी सुधारित आदेश जारी केला. यानुसार दवाखाने, मेडिकल्स २४ तास सुरू राहणार असून अत्यावश्यक सेवेतील उर्वरित दुकाने सकाळी ७ ते ११ या वेळेतच सुरू राहत आहेत. ११ वाजतानंतर शहरातील सर्व अत्यावश्यक सेवेतील दुकान बंद ठेवण्याचे आदेशाने रिसोड शहरात २१ एप्रिल रोजी दुपारी सर्वत्र मार्केट बंद झाल्यामुळे तसेच विनाकारण रस्त्यावर फिरणाऱ्यावर कारवाईचे आदेश आल्यामुळे शहरातील अनेक नागरिकांनी घरात राहणे पसंत केले. त्यामुळे रिसोड शहरात दुपारी सर्वत्र शुकशुकाट दिसून आला. कोरोनाची साखळी तोडण्यासाठी नागरिकांनी विनाकारण बाहेर फिरू नये, असे आवाहन तालुका प्रशासनाने केले.