जिल्ह्यात कोरोना रुग्णांची संख्या कमी होत असल्याने जिल्हावासीयांना दिलासा मिळत आहे. नव्याने कोरोना रुग्ण आढळून येण्याचे प्रमाण अतिशय घटले असून, कोरोनावर मात करणाऱ्यांची संख्यादेखील वाढत असल्याचे चित्र आहे. मंगळवारी नव्याने ३ रुग्ण आढळून आले तर १० रुग्णांनी कोरोनावर मात केल्याने त्यांना डिस्चार्ज देण्यात आला. कारंजा, मंगरुळपीर व मालेगाव तालुक्यात एकही रुग्ण आढळून आला नाही. आतापर्यंत ४१,५८० रुग्ण आढळून आले आहेत. यापैकी ४०,८५५ रुग्णांनी कोरोनावर मात केली तर आतापर्यंत ६२२ जणांचा मृत्यू झाला. कोरोनाची दुसरी लाट ओसरत असली तरी तिसऱ्या लाटेची शक्यता वर्तविण्यात येत असल्याने नागरिकांनी काळजी घ्यावी, असे आवाहन जिल्हा प्रशासन व आरोग्य विभागाने केले.
००००
१०२ सक्रिय रुग्ण
मंगळवारच्या अहवालानुसार, नव्याने ३ रुग्ण आढळून आले तर १० रुग्णांनी कोरोनावर मात केली आहे. सध्या सरकारी कोविड केअर सेंटर, कोविड हॉस्पिटल, गृहविलगीकरणात असे एकूण १०२ रुग्ण सक्रिय आहेत.
00000000
तीन तालुके निरंक
मंगळवारच्या अहवालानुसार कारंजा, मालेगाव व मंगरुळपीर या तीन तालुक्यात एकही रुग्ण आढळून आला नाही. जिल्ह्याचे मुख्यालय असलेल्या वाशिम शहरात एक रुग्ण आढळून आला. रिसोड व मानोरा शहरातही रुग्ण आढळून आले नाही. रिसोड तालुक्यातील महागाव व मानोरा तालुक्यातील इंझोरी येथे प्रत्येकी एक रुग्ण आढळला.
००००००००००००००००