वेतनवाढीसाठी घेतली लाच

मानधनावरील शिक्षकाचा पगार काढण्यासाठी १५ हजारांची लाच घेताना केंद्रीय विद्यालयाचे प्राचार्य हरिश शेडमेखे यांना सीबीआयच्या लाचलुचपत प्रतिबंधक विभागाने गुरुवारी दुपारी रंगेहाथ अटक केली़.

भुसावळ (जि. जळगाव) : मानधनावरील शिक्षकाचा पगार काढण्यासाठी १५ हजारांची लाच घेताना केंद्रीय विद्यालयाचे प्राचार्य हरिश शेडमेखे यांना सीबीआयच्या लाचलुचपत प्रतिबंधक विभागाने गुरुवारी दुपारी रंगेहाथ अटक केली़ शेडमेखे हे २९ आॅगस्ट २०१२ मध्ये भुसावळच्या केंद्रीय विद्यालयात रूजू झाले होते. भुसावळ आॅर्डनन्स फॅक्टरीतील केंद्रीय विद्यालयात ११ शिक्षक मानधनावर काम करतात. दरमहा मिळणार्‍या पगारातील काही रक्कम शेडमेखे यांच्याकडून मागितली जात असल्याने शिक्षक सुरजकुमार डुबे यांनी मुंबईच्या सीबीआय लाचलुचपत विभागाकडे तक्रार केली होती़ डुबे यांचा सहा महिन्यांपासून पगार अडकल्यानंतर प्राचार्यांनी त्यांच्याकडून दरमहा चार हजाराप्रमाणे रक्कम मागितली होती. ती देण्याची तक्रारदाराची इच्छा नव्हती, मात्र प्राचार्यांनी २४ हजारांऐवजी २० हजार रुपये घेण्याचे मान्य केल्यानंतर १५ हजार रोखीने गुरुवारी देण्याचे व उर्वरित पाच हजार शिक्षकाचा धनादेश वटल्यानंतर देण्याचे ठरले. गुरुवारी भल्या पहाटे सीबीआयचे पथक शहरात दाखल झाले व केंद्रीय विद्यालयाची टेहळणी करून त्यांनी सापळा लावला.