मीरारोड - मीरारोड जाफरी खाडीच्या पात्र परिसरात कांदळवन क्षेत्रात भरणी करून सपाटीकरण, भिंती बांधून झोपड्या केल्याप्रकरणी तलाठी यांच्या फिर्यादी वरून नया नगर पोलिसांनी ७ जणांवर पर्यावरण संरक्षण कायद्याखाली गुन्हा दाखल केला आहे. भूमाफियांनी कांदळवनात भरणी करून कांदळवनाची तोड केल्याची तक्रार वसुंधरा संस्थेच्या अमजद खान यांनी केली होती. १ ऑगस्ट रोजी स्थळपाहणी करण्यात आली असता शांती नगर सेक्टरच्या मागे मौजे. पेणकर पाडा सर्व्हे क्र . नविन ३८ / २ या जागेवर कांदळवनची तोड करत पत्र्याचे कुपंण , दगड मातीचा भराव टाकुन जेसीबीच्या सहाय्याने सपाटीकरण व विटांच्या भिंती बाधुन तीन - चार झोपड्या बांधल्याचे आढळले . येथे अविसिनिया मरीना या प्रजातीची झाडे आहेत.
सातबारा उताऱ्यावरील जमीन मालक जालिंदर पाटील, प्रमिला पाटील, भारती पाटील, रंजना पासे, रवींद्र पाटील, वत्सला म्हात्रे, शकुतंला पाटील यांच्यावर कांदळवनाचा -हास केल्या बद्दल तलाठी वंदना आव्हाड यांच्या फिर्यादी वरून नया नगर पोलीस ठाण्यात गुन्हा दाखल झाला. वरिष्ठ पोलीस निरीक्षक विलास सुपे यांच्या मार्गदर्शनाखाली अधिक तपास सुरु आहे .