अध्यक्षपदी संदीप देशमुख, उपाध्यक्ष नरेंद्र थोरात

सहकारमहर्षी स्व. बापूरावजी देशमुख शेतकरी सहकारी सुतगिरणीच्या अध्यक्ष व उपाध्यक्षपदाची निवडणूक सोमवारी झाली.

स्व. बापुराव देशमुख सुतगिरणीची निवडणूक : सहकार गटाचे १३ संचालक वर्धा : सहकारमहर्षी स्व. बापूरावजी देशमुख शेतकरी सहकारी सुतगिरणीच्या अध्यक्ष व उपाध्यक्षपदाची निवडणूक सोमवारी झाली. यात अध्यक्षपदी संदीप सुरेश देशमुख तर उपाध्यक्षपदी हिंगणघाटचे नरेंद्र थोरात यांची अविरोध निवड झाली. संचालक मंडळात सहकार गटाचे १३ तर आठ संचालक भाजपाचे आहेत.नवनिर्वाचित अध्यक्ष संदीप देशमुख यांनी बापूराव देशमुख यांच्या प्रतिमेला अभिवादन करीत सर्व माजी अध्यक्ष व नवनिर्वाचित संचालकांची भेट घेतली. सुतगिरणी जरी भाडेतत्वावर असली तरी लवकरच स्वयंपूर्णकडे वाटचाल करणार असल्याचे मत व्यक्त केले. सुतगिरणी उभी करण्यात दाआजीबरोबर असंख्य लोकांनी हातभार लावला. याची आम्हाला जाणीव असून सुतगिरणी प्रगतीपथावर नेण्याचे ध्येय आम्ही बाळगले असल्याचेही ते म्हणाले. केंद्रात व राज्यात भाजपाचे सरकार आहे. सुतगिरणीमध्ये आठ सहकारी त्यांचे आहेत. त्यांच्या सहकार्याने अधिकाधिक योजना आणण्याचे प्रयत्नही असून सर्वांच्या विश्वासाने आणि सहकार्याने सुतगिरणी सक्षम करणार असल्याचे त्यांनी सांगितले. सहकार नेते प्रा. सुरेश देशमुख यांच्या शब्दावर विश्वास ठेऊन ज्या उमेदवारांनी उमेदवारी अर्ज मागे घेतला. सुतगिरणी निवडणूक अविरोध होण्यासाठी ज्यांनी मोलाचे सहकार्य केले, अशा सर्वांच सभासदांशी संदीप देशमुख यांनी चर्चा केली. (प्रतिनिधी)