वर्धा: नजीकच्या पारडी येथील माधव कंगाले यांचा मृतदेह परिसरातील संत्र्याच्या झाडाला टांगलेल्या अवस्थेत दिसून आला होता. पोलिसांनी तक्रारीवरून आकस्मिक मृत्यूची नोंद केली. मात्र तपासात माधवने आत्महत्या केली नसून त्याची हत्या केल्याची गंभीर बाब तपासात समोर आली. या प्रकरणी मृतकाचा मुलगा सुभाष कंगाले व त्याचा शेजारी विलास पेंदाम याला अटक करण्यात आली आहे. पोलीस सुत्रानुसार, रविवार १८ मे रोजी तळेगाव(श्या.) नजीकच्या पारडी येथील माधव कंगालेचा मृतदेह गावाजवळ असलेल्या संत्र्याच्या झाडाला टांगून होता. त्याच्या मुलाच्या तक्रारीवरून पोलिसांनी आकस्मिक मृत्यूची नोंद केली. पोलिसांनी मृतदेह ताब्यात घेत शवचिच्छेदनाकरिता सेवाग्राम रुग्णालयात पाठविला. मृतदेहाचा शवविच्छेदन अहवाल प्राप्त झाल्यावर पोलिसांनी तपास केला असता मृतकाच्या डोक्यावर गंभीर इजा झाल्याचे समोर आले आहे. यावरून पोलिसांनी तपासाची सुत्रे हलविली असता माधव कंगाले यांचा शेजारी राहत असलेल्या विलास पेंदाम याच्याशी वाद झाला. या वादात विलास याने माधवराव याला मारहाण केली. यात माधव जखमी होताच त्याने आणखी शिवीगाळ करणे सुरू केली. त्याची शिवीगाळ ऐकूण त्याचा मुलगा सुभाष कंगाले याने माधव याला पुन्हा मारहाण केली. यात तो गंभीर जखमी झाला. रात्री माधवची प्रकृती खालावल्याने त्याचा मृत्यू होईल व आपल्यावर हत्येचा गुन्हा दाखल होईल या भीतीपोटी या माधवचा मृतदेह संत्र्याच्या झाडाला टांगल्याची कबुली या दोघांनी दिली. या प्रकरणी पोलिसांनी सुभाष कंगाले व विलास पेंदाम या दोघांना अटक केली. ही कारवाई एसडीओ बुरडे यांच्या मार्गदर्शनात पोलीस निरीक्षक दिनेश झांबरे यांच्यासह त्यांच्या चमूने केली. (प्रतिनिधी)
माधवची आत्महत्या नसून हत्याच
By admin | Updated: May 24, 2014 00:06 IST