: दोन्ही दुकानातील १५ लाखांचे नुकसान
पुलगाव : येथील भगतसिंग चौकातील सुखीजा एन्टरप्रायजेस व महेश इलेक्ट्रॉनिक्स अ‍ॅण्ड इलेक्ट्रिकल या दोन दुकानांना भीषण आग लागली. ही घटना शनिवारी पहाटे ३ वाजताच्या सुमारास घडली. सीएडी कॅम्पमधील तीन अग्निशमन दलाच्या दोन तास प्रयत्नानंतर आग आटोक्यात आली. या आगीत दोन्ही दुकानातील साहित्याचा कोळसा झाल्याने अंदाजे १५ लाख रुपयांचे नुकसान झाल्याचा प्राथमिक अंदाज व्यक्त करण्यात आला आहे. शहरातील व्यापारी देवकुमार भोजराज सुखीजा रा. सिंधी कॅम्प याचे सुखीजा एन्टरप्राईजेस नामक दुकान आहे. रात्र गस्तीवर असलेल्या पोलिसांना दुकानाच्या मागच्या बाजूने आग लागल्याचे निदर्शनास आले. त्यांनी लागलीच ठाण्यात माहिती देत अग्निशमन दलाला पाचारण केले. दुकानाचे शटर उघडले असता आगीचे लोळ उठताना दिसले. यात दुकानातील पंखे, आलमारी, फर्निचर, टिव्ही, एलसीडी, शिलाई मशीन, कुलर्स व आवश्यक कागदपत्र खाक झालीत. या आगीने लगतच्या महेश सुखीजा यांच्या इलेक्ट्रिकल्सच्या दुकानाला विळख्यात घेतले. या आगीत त्यांच्या दुकानातील साहित्य जळून खाक झाले. प्राथमिक अंदाजानुसार सुखीजा एन्टरप्राईजेसचे १० लाख तर महेश इलेक्ट्रिकल्स या दुकानाचे पाच लाख रुपयांचे नुकसान झाले आहे. या प्रकरणी पोलीस ठाण्यात नोंद करण्यात आली आहे.(तालुका/शहर प्रतिनिधी)