वाढत्या गुन्हेगारीने महासंचालक चिंतेत

यवतमाळ शहरच नव्हे तर संपूर्ण जिल्ह्यात गेल्या काही दिवसांपासून खून, खुनाचा प्रयत्न, घरफोड्या, चोऱ्या, वाटमारी या सारखे गुन्हे मोठ्या प्रमाणात वाढले आहे.

यवतमाळ जिल्हा : ‘आयजी’ घेणार आज आढावा यवतमाळ : यवतमाळ शहरच नव्हे तर संपूर्ण जिल्ह्यात गेल्या काही दिवसांपासून खून, खुनाचा प्रयत्न, घरफोड्या, चोऱ्या, वाटमारी या सारखे गुन्हे मोठ्या प्रमाणात वाढले आहे. याबाबत थेट राज्याचे पोलीस महासंचालक प्रवीण दीक्षित यांनी तीव्र चिंता व्यक्त केली आहे. या पार्श्वभूमीवर अमरावती परिक्षेत्राचे प्रभारी पोलीस महानिरीक्षक प्रकाश मुत्याल यांना गुरुवारी ५ मे रोजी यवतमाळात क्राईम मिटींगसाठी पाठविण्यात आले आहे. अमरावतीचे महानिरीक्षक संजीवकुमार सिंघल रजेवर आहेत. त्यांचा अतिरिक्त प्रभार राज्य राखीव पोलीस दलाचे नागपूर येथील महानिरीक्षक प्रकाश मुत्याल यांच्याकडे आहे. ते गुरुवारी यवतमाळ जिल्ह्यातील सर्व ठाणेदार आणि उपविभागीय पोलीस अधिकाऱ्यांची आढावा बैठक घेणार आहेत. विशेष असे यवतमाळचे जिल्हा पोलीस अधीक्षक अखिलेशकुमार सिंह हेसुद्धा ११ मेपर्यंत रजेवर असल्याने त्यांचा अतिरिक्त प्रभार अपर अधीक्षक काकासाहेब डोळे यांच्याकडे आहे. जानेवारी ते एप्रिल २०१६ या चार महिन्यात जिल्ह्यात प्रॉपर्टी व शरीरासंबंधीच्या गुन्ह्यांमध्ये प्रचंड वाढ झाली आहे. गेल्या दोन महिन्यात तर दरदिवशी कुठे खून, कुठे घरफोडी तर कुठे वाटमारी जणू नित्याचीच झाली होती. खून, खुनाचा प्रयत्न हे गुन्हे मोठ्या प्रमाणात दाखल झाले. जुना गुन्हा उघडकीस येण्यापूर्वीच नवा गुन्हा घडत आहे. ही गुन्हेगारी रोखण्याच्या दृष्टीने पोलिसांकडून व्यापक प्रतिबंधात्मक उपाययोजनाही होताना दिसत नाही. सर्रास गुन्हे घडत आहे. परंतु डिटेक्शनचा पत्ता नाही. भरदिवसा घरफोड्या होत आहेत. चोरटे लाखो रुपयांच्या रोकड, सोन्या-चांदीच्या दागिन्यांवर हात साफ करीत आहे. दिवसाढवळ्या महिलांच्या गळ्यातील मंगळसूत्र हिसकावण्याच्या, बॅग हिसकावण्याच्या घटना घडत आहे. मात्र चोरटे शोधण्यात पोलिसांना यश येत नाही. जानेवारी ते एप्रिल या चार महिन्याचा क्राईम चार्ट पाहून खुद्द पोलीस महासंचालक प्रवीण दीक्षित यांनीही चिंता व्यक्त केली. अखेर या वाढत्या गुन्हेगारीला प्रतिबंध घालणे, डिटेक्शन वाढविणे याबाबत मार्गदर्शन करून गुन्हेगारीचा आढावा घेण्यासाठी खास पोलीस महानिरीक्षकांना महासंचालकांनी जिल्ह्यात पाठविले. गुरुवारी ते क्राईम मिटींग घेऊन महासंचालकांना अहवाल सादर करणार आहे. (जिल्हा प्रतिनिधी) एकाच महिन्यात ११ खून सन २०१६ मध्ये एकट्या मार्च महिन्यात जिल्ह्यात तब्बल खुनाच्या ११ गुन्ह्यांची नोंद झाली आहे. खुनाचा प्रयत्न ११, बलात्कार १०, दंगे २८, दुखापत १२८, महिलांसंबंधीचे गुन्हे १२६, दरोड्याचा प्रयत्न १ तर अ‍ॅट्रोसिटीचे १४ गुन्हे एकाच महिन्यात नोंदविले गेले आहे. अशीच आकडेवारी एप्रिल महिन्याचीसुद्धा आहे. काही प्रकरणात त्यात उलट वाढ झाली आहे. घडणाऱ्या घटनांच्या तुलनेत डिटेक्शन मात्र नसल्यात आहे. जिल्हा दंडाधिकारीही नाराज यवतमाळ जिल्हा पोलीस दलाच्या सध्याच्या कामगिरीवर खुद्द जिल्हा दंडाधिकारी सचिंद्रप्रताप सिंह यांनीही नाराजी व्यक्त केल्याची माहिती आहे. पोलिसांची पकड सैल झाल्याचे नमूद करीत त्यांनी ‘मिनी एसपी’ म्हणून ओळखल्या जाणाऱ्या पोलीस अधिकाऱ्याची कक्षात बोलावून चांगलीच झाडाझडती घेतल्याचे सांगितले जाते.