शहरात सीसीटीव्ही व पीएस सिस्टीम

गुन्हेगारीवर आळा बसवून कायदा सुव्यवस्था राखण्याकरिता विविध भागातील घडामोंडीवर लक्ष ठेवण्याकरिता

वर्धा : गुन्हेगारीवर आळा बसवून कायदा सुव्यवस्था राखण्याकरिता विविध भागातील घडामोंडीवर लक्ष ठेवण्याकरिता सीसीटीव्ही कॅमेरे व वाहतूक नियंत्रणासह अत्यावश्यक बाबी नागरिकांपर्यंत तत्काळ पोहोचविण्याच्या दृष्टीने पीएस सिस्टीम वर्धा शहरवासीयांच्या सेवेत रूजू होणार आहे. जिल्हा पोलीस प्रशासनाच्यावतीने सादर करण्यात आलेल्या प्रस्तावाला जिल्हाधिकाऱ्यांनी हिरवी झेंडी दिली आहे. शिवाय या कामाकरिता एक कोटी रुपये मंजूर करण्यात आले आहेत. विस्तारीत होत असलेल्या वर्धा शहरातील कानोकोपऱ्यात विविध घटना घडत आहेत. यात गुन्हेगारीचे प्रमाण वाढत आहेत. या प्रकारांवर आळा बसविण्याचे पोलीस विभागाचे प्रयत्न आहेत. बऱ्याच घटनांची माहिती पोलिसांना उशिरा मिळत असल्याने त्यावर वेळीच आळा बसविणे कठीण जात आहे. यामुळे शहरातील कानाकोपऱ्यात सीसीटीव्ही कॅमेरे लावण्याचा प्रस्ताव सादर करण्यात आला होता. या प्रस्तावात सीसीटीव्ही कॅमेऱ्यासह शहरात अद्ययावत पीएस सिस्टीम (पब्लिक अ‍ॅड्रेस सिस्टीम) सुरू करण्याचा उल्लेख होता. या कामाकरिता एक कोटी रुपयांचा खर्च होणार असल्याचे नमूद करण्यात आले होते. तसा प्रस्ताव जिल्हाधिकारी कार्यालयात सादर करण्यात आला होता. या प्रस्तावाला जिल्हाधिकारी आशुतोष सलील यांनी मान्यता दिली आहे. शिवाय लागणारा खर्चही मंजूर करण्यात आला आहे. या कामाला लवकरच सुरुवात होणार असल्याची माहिती पोलीस विभागाकडून देण्यात आली आहे. शहरात यापूर्वी आर्वी नाका व बजाज चौक परिसरात सीसीटीव्ही कमेरे लावण्यात आले होते. काही दिवस ते सुरळीत सुरू राहिले. कालांतराने त्यातील काही कॅमेरे बंद पडले. त्यांचा दुरूस्तीचा प्रस्तावही शासनाकडे असल्याची माहिती आहे.(प्रतिनिधी) पारधी समाजाला रोजगार उपलब्ध करण्याकरिता पाच लाखांचे अनुदान४जिल्ह्यातील गुन्ह्याचा विचार केल्यास यात पारधी समाजाचा मोठा वाटा असल्याचे दिसून येते. या समाजाकडून दारूभट्टी वा चोऱ्यांचे गुन्हे घडत आहेत. या समाजातील नागरिकांनी या व्यवसायापासून दूर व्हावे या उद्देशाने समाजबांधवांना मगनवाडी येथील महात्मा गांधी ग्रामीण औद्योगीकरण संस्थेत प्रशिक्षण देण्याचा प्रस्ताव सादर करण्यात आला होता. या प्रस्तावालाही जिल्हाधिकाऱ्यांकडून मंजुरी मिळाली आहे. याकरिता पाच लाख रुपये देण्यात येणार असल्याची माहिती आहे. या निधीतून प्रशिक्षण घेणाऱ्या पारधी समाजातील नागरिकांना कुटीर उद्योग सुरू करण्याकरिता आवश्यक साधन सामग्री उपलब्ध करून देण्यात येणार असल्याचे पोलीस विभागाकडून सांगण्यात आले आहे. एक कोटी रुपयांत होणारी कामे ४सीसीटीव्ही- वर्धा शहरातील गुन्ह्यांवर प्रतिबंध लावण्याकरिता कायदा व सुव्यवस्था राखणे शहरातील वाहतूक सुरळीत करण्याकरिता सीसीटीव्ही कॅमेरे लावण्यात येणार आहेत. ४पब्लिक अ‍ॅड्रेस सिस्टीम - कायदा व सुव्यवस्थेचा प्रश्न निर्माण झाल्यास पीएस सिस्टीमच्या मदतीने नागरिकांना सूचना देता येतील. नागरिकांना मार्गदर्शन करून शांतता राखण्याबाबत सुचीत करणे, अफवावर आळा घालण्याचे काम यातून होणार आहे.४सुसज्ज नियंत्रण कक्ष - महत्वाच्या ठिकाणी सीसीटीव्ही द्वारे लक्ष ठेवण्याकरिता सुसज्ज नियंत्रण कक्ष तयार करण्यात येणार आहे. रियल टाईम मॉनीटरींग करण्यात याचा लाभ होणार आहे.