लोकमत न्यूज नेटवर्क
उल्हासनगर : कॅम्प नं-३ येथील सम्राट अशोकनगरमधील नगरसेवक, समाजसेवक, महिला व नागरिकांनी एकत्र येत ‘नशेखोरांविरोधात एक लढा’ असे आंदोलन उभे केले. त्यासाठी महिलांचे एक पथक तैनात केले असून, त्यांना मध्यवर्ती पोलीस ठाण्याचे वरिष्ठ पोलीस निरीक्षक सुधाकर सुरवाडकर यांनी मार्गदर्शन केले.
उल्हासनगरसह सम्राट अशोकनगरच्या मुख्य रस्त्यावर पार्किंग केलेल्या गाड्यांमध्ये काही नशेखोर तरुण बसतात. त्यांच्याकडून दारू, अंमली पदार्थाचे सेवन करणे, जोरजोराने ओरडणे, शिवीगाळ करणे, महिला व तरुणींना छेडणे, आदी प्रकारात वाढ झाल्याचा आरोप समाजसेवक शिवाजी रगडे यांनी केला. अशांना आळा घालण्यासाठी रगडे यांनी सम्राट अशोकनगर येथून ‘एक लढा नशेखोराविरोधात’ या आंदोलनाची सुरुवात केली आहे. त्यांनी स्थानिक नगरसेवक, समाजसेवक, महिला व नागरिकांना विश्वासात घेतले.
येथील महिला पथकासह नागरिकांना मार्गदर्शन करण्यासाठी मध्यवर्ती पोलीस ठाण्याचे वरिष्ठ पोलीस निरीक्षक सुधाकर सुरवाडकर हे सोमवारी रमाबाई आंबेडकर विद्यालयाच्या प्रांगणात उपस्थित होते. त्यांनी शहरातील प्रत्येक विभागात असा लढा उभे राहणे गरजेचे असल्याचे मत व्यक्त केले. तसेच पोलीस तुमच्या सोबत असतील, असे आश्वासन दिले. या मार्गदर्शन कार्यक्रमाला समाजसेवक शिवाजी रगडे, रिपाइं नेते महादेव सोनवणे, नगरसेविका सविता तोरणे-रगडे, दशरथ चौधरी, गौतम ढोके, रामेश्वर गवई, सुनील खांडेकर, प्रवीण वासनिक यांच्यासह स्त्रीशक्ती पथकांच्या महिला, नागरिक मोठ्या प्रमाणात उपस्थित होते.