ठाणे: घोडबंदर रोडने भरधाव वेगाने निघालेला ट्रेलर रस्त्यालगत लावलेल्या मेट्रोच्या बॅरिकेटला धडकली आणि पुढे जाऊन तो रस्त्यावर उलटला. दरम्यान जखमी अवस्थेत ट्रेलरचालकाने तेथून पळ काढल्याची घटना शुक्रवारी पहाटेच्या सुमारास घडली. सुदैवाने या घटनेमुळे कोणत्याही प्रकारे वाहतूक कोंडी झाली नसल्याची माहिती ठामपा आपत्ती व्यवस्थापन कक्षाने दिली.
जखमी अवस्थेत पळून गेलेला चालक हा शुक्रवारी पहाटे पावणे पाच वाजण्याच्या सुमारास भरधाव वेगाने घोडबंदर रोडवरील भाईंदर पाडा येथून जात होता. याचदरम्यान तो ट्रेलर रस्त्यालगत मेट्रोचे काम सुरू असलेल्या मेटल बॅरिकेटला जाऊन जोरात धडकला आणि पुढे जात रस्त्यावर उलटला. यामध्ये ट्रेलरचे नुकसान झाले असून चालक ही जखमी झाला आहे. त्यातच घाबरलेल्या अवस्थेत त्याने तेथून पळून जात, जवळच्या रुग्णालयात उपचारार्थ दाखल झाला असावा.
घटनेची माहिती कळताच कासारवडवली पोलीस , वाहतूक पोलीस यांनी घटनास्थळी धाव घेतली. त्यानंतर क्रेनच्या मदतीने वाहतूक कोंडी होण्यापूर्वीच रस्त्यावर उलटलेला ट्रेलर बाजूला केला. तसेच हा ट्रेलर रोहित कुमार यांच्या मालकीचा असून त्यामध्ये नेमके काय आहे हे समजु शकले नाही अशी माहिती कक्षाच्या अधिकाऱ्याने दिली.