ठाणे : प्रभागातील एखाद्या गोरगरीब रहिवाशाच्या नावाने नगरसेवकांशी संपर्क साधून वैद्यकीय मदतीच्या नावाखाली ठाणे महापालिकेच्या दोन नगरसेवकांना भामट्यांनी हजारो रुपयांनी गंडा घातल्याची धक्कादायक माहिती बुधवारी महानगरपालिकेच्या महासभेत उघडकीस आली. कळवा येथील छत्रपती शिवाजी महाराज रुग्णालयात एमआरआय करण्यासाठी डॉक्टरने एक हजार रुपये कमी केले आहेत. उर्वरित रक्कम ‘गुगल पे’ने अदा करावी, अशी बतावणी करून एका भामट्याने नगरसेवकांना फसवले. विशेष म्हणजे ज्या नगरसेवकांना हा गंडा घातला गेला, त्यांनीच ही बाब प्रशासनाच्या निदर्शनास आणून दिली. लोकांना गंडविणारी अशाप्रकारची टोळीच सक्रिय असल्याचा आरोप भाजपचे गटनेते मनोहर डुंबरे यांनी केला असून, या प्रकाराची गंभीर दखल घेऊन संबंधितांवर गुन्हे दाखल करण्याचा निर्णय यावेळी सभागृहात घेण्यात आला.
शिवसेनेचे नगरसेवक एकनाथ भोईर यांनी सभागृहास दिलेल्या माहितीनुुसार, ठाणे महापालिकेच्या छत्रपती शिवाजी महाराज रुग्णालयातील एमआरआय सेंटरमध्ये आपल्या तीन वर्षांच्या मुलीच्या एमआरआयसाठी पैसे कमी पडत असल्याचा फोन आपल्याला आला होता. ज्या व्यक्तीने फोन केला, त्या व्यक्तीकडे केवळ अडीच हजार रुपये होते. मी तुमच्या प्रभागाचा रहिवासी आहे, असे त्याने भोईर यांना सांगितले. एमआरआयसाठी सहा हजार रुपयांची गरज आहे, असे त्याचे म्हणणे होते. त्यानंतर आपण स्वत: रुग्णालयाच्या डीनशी बोलून पैसे कमी करण्याची विनंती केली. मात्र, डीन यांनी त्यांच्या केबिनमध्येही या रहिवाशास येऊ दिले नाही, असे भोईर यांनी सांगितले.
अशाच प्रकारे एमआरआयसाठी पैसे कमी पडत असल्याचा फोन आपल्यालादेखील आला असून, याद्वारे आपलीही फसवणूक झाल्याची माहिती शिवसेनेचे नगरसेवक गुरूमुखसिंग स्यांन यांनी दिल्यानंतर सभागृह अवाक् झाले. शिवसेनेचे नगरसेवक सुधीर कोकाटे यांनादेखील अशाच प्रकारे फोन आल्याचे त्यांनी सभागृहास सांगितले. मात्र, आपण त्यात फसलो नसल्याचेही त्यांनी स्पष्ट केले. भाजपचे गटनेते मनोहर डुंबरे यांनी अशा प्रकारची टोळीच सक्रिय असल्याचे सभागृहात सांगितले. प्राथमिक स्वरूपात पालिकेच्या या दोन नगरसेवकांची फसवणूक झाली असली तरी, इतरही नगरसेवकांची फसवणूक झाली असल्याची शक्यता असल्याने या संपूर्ण प्रकरणाची गंभीर दखल घेऊन गुन्हे दाखल करण्याचा निर्णय सर्वसाधारण सभेत घेण्यात आला.
अशा पद्धतीने केली पैशांची लूट
ज्या व्यक्तीने पैसे मागण्यासाठी भोईर यांना फोन केला होता, तिने आपण आपल्याच प्रभागाचे रहिवासी असल्याचे भोईर यांना सांगितले. कळवा हॉस्पिटलमध्ये एमआरआय करणाऱ्या डॉक्टरचे नाव एकनाथ शिंदे असून ते फक्त एक हजार रुपये कमी करत असल्याचे भोईर यांना त्याने सांगितले. उर्वरित पैशांची आपल्याकडे व्यवस्था नसून, त्याने भाेईर यांना मदत करण्याची विनवणी केली. विशेष म्हणजे नगरसेवक गुरूमुखसिंग स्यांन यांनी या सर्व प्रकारचा शोध लावल्यानंतर फसवणारी व्यक्ती नाशिकची असल्याचे उघड झाले आहे.