वडघरच्या सरपंचपदी सुषमा पाटील विजयी

भिवंडी : तालुक्यातील २८ ग्रामपंचायतींच्या सरपंच, उपसरपंच पदासाठी बुधवारी निवडणूक झाली. या निवडणुकीमध्ये बहुचर्चित असलेल्या वडघर ग्रामपंचायतीच्या सरपंचपदी सुषमा पाटील यांचा विजय झाला आहे. तर उपसरपंचपदी नंदकुमार पाटील हे बिनविरोध निवडून आले. अवघी सात सदस्य संख्या असतानाही वडघर ग्रामपंचायतीची निवडणूक तालुक्यात चर्चेला आली होती. बुधवारी निवडणूक निर्णय अधिकारी के. एल. शिगवण यांच्या उपस्थितीत सरपंचपदासाठी निवडणूक झाली. यावेळी सुषमा पाटील यांना पाच मते तर सरिता पाटील यांना अवघी दोन मते पडली. पाटील यांची निवड जाहीर होताच त्यांच्या समर्थकांनी फटाके फोडून जल्लोष केला. ग्रामस्थांनी आपल्यावर जो विश्वास दाखविला आहे त्याला तडा जाऊ देणार नाही, तसेच गावाच्या विकासासाठी सर्वतोपरी प्रयत्न करू, अशी प्रतिक्रिया पाटील यांनी दिली. यावेळी नवनिर्वाचित सदस्य गुरुनाथ जाधव, पौर्णिमा पाटील, भाग्यश्री पाटील यांचाही ग्रामस्थांनी सत्कार केला.