सुनंदा कोट यांना मिळाली ‘क्लीन चिट’?

स्वत:च्या पक्षाचे सूचक अनुमोदक नसतानाही शिवसेनेच्या सहकार्याने प्रभाग समिती अध्यक्षपदी निवडून आलेल्या सुनंदा कोट यांना त्यांच्या मनसे पक्षाने कारणे दाखवा नोटीस बजावली होती.

कल्याण : स्वत:च्या पक्षाचे सूचक अनुमोदक नसतानाही शिवसेनेच्या सहकार्याने प्रभाग समिती अध्यक्षपदी निवडून आलेल्या सुनंदा कोट यांना त्यांच्या मनसे पक्षाने कारणे दाखवा नोटीस बजावली होती. परंतु, आजतागायत कोणतीही कारवाई त्यांच्यावर न झाल्याने मनसेने त्यांना ‘क्लीन चिट’ दिल्याची चर्चा पालिका वर्तुळात आहे. दरम्यान, कोट यांचा खुलासा पक्षाचे सरचिटणीस राजू पाटील यांच्यामार्फत पक्षश्रेष्ठींकडे पाठवल्याची माहिती मनसेचे गटनेते प्रकाश भोईर यांनी दिली. त्यांच्या आदेशानुसार पुढील निर्णय घेतला जाईल, असेही त्यांनी स्पष्ट केले.केडीएमसीच्या १० प्रभाग समिती अध्यक्षपदाची निवडणूक ५ जुलैला झाली. दहाही समित्यांवर महिला उमेदवारांचा प्रत्येकी एकमेव अर्ज आल्याने त्यांची अध्यक्षपदी बिनविरोध निवड झाली. ‘अ’ प्रभाग समितीवर अध्यक्षपदाच्या निवडणुकीसाठी मनसेच्या नगरसेविका सुनंदा मुकुंद कोट यांनीही अर्ज दाखल केला होता. विशेष म्हणजे, या प्रभागात अध्यक्षपदासाठी उमेदवारी दाखल करण्यासाठी पुरेसे सूचक व अनुमोदक नसताना कोट यांनी शिवसेनेच्या सहकार्याने अध्यक्षपदासाठी उमेदवारी अर्ज भरला होता. त्यांना शिवसेनेचे गणेश कोट आणि हर्षाली थवील यांचे सूचक आणि अनुमोदन लाभले होते. ‘अ’ प्रभागात एकमेव उमेदवारी अर्ज आल्याने निवडणुकीच्या वेळी त्यांच्या बिनविरोध निवडीवर शिक्कामोर्तब करण्यात आले.दरम्यान, अध्यक्षपदासाठी उमेदवारी अर्ज भरताना कोट यांनी त्यांच्या मनसे पक्षाला अंधारात ठेवले तर महापालिकेतील मनसेचे पदाधिकारी असलेले विरोधी पक्षनेते मंदार हळबे आणि गटनेते प्रकाश भोईर यांना याबाबत कोणतीही माहिती दिली नाही. भोईर यांनी पक्षातील वरिष्ठांकडे चौकशी करताच त्यांनाही कोट यांनी कल्पना दिली नसल्याचे समजले. त्यामुळे गटनेत्यांनी कोट यांना रितसर कारणे दाखवा नोटीस बजावली. परंतु, पक्षाने त्यांच्यावर कोणतीही कारवाई केली नाही.