ठाणे : दुचाकी चोरीच्या गुन्ह्याच्या तपासात ताब्यात घेतलेल्या मीरा रोड येथील गार्फील्ड मेंनेझीस याने चौकशीत त्याच्या साथीदार रमेश हरी सिंग याच्यासह मोटारसायकल आणि सोनसाखळी चोरी अशा चार गुन्ह्यांची कबुली दिली आहे. त्यानुसार दोघांना अटक करून त्यांच्याकडून ४ गुन्ह्यातील दोन दुचाकींसोबत ५ तोळ्याचे सोन्याचे दागिने असा मुद्देमाल हस्तगत केल्याची माहिती कासारवडवली पोलिसांनी दिली.
काही दिवसांपासून कासारवडवली पोलीस ठाण्याच्या कार्यक्षेत्रात दुचाकी चोरीचे प्रकार वाढले होते. ते गुन्हे उघडकीस आणण्याबाबत वरिष्ठ पोलीस निरीक्षक किशोर खैरनार यांनी अधिकारी व कर्मचाऱ्यांना सुचना करून गस्त वाढण्याबाबत सूचना केल्या होत्या. त्यानुसार गस्तीदरम्यान संशयितांवर पाळत ठेवत असताना १४ मे रोजी गस्तीवर असलेल्या पथकाने संशयास्पदरित्या फिरणाºया दोघांना हटकले.
त्यातील एक जण पळून गेला तर दुसरा पळून जाताना त्याला पकडून अंगझडती घेतली असता त्याच्याकडे एक गावठी कट्टा सापडला. तसेच मेंनेझीस (४४) याने साथीदार रमेश सिंग यांच्यासह मोटारसायकल आणि सोनसाखळी चोरीच्या गुन्ह्याची क बुली दिल्यावर रमेशला बोरीवलीतून अटक केली. त्यांच्याकडून नवघर पोलीस ठाण्याच्या हद्दीत चोरलेली दुचाकी तसेच कासारवडवली पोलीस ठाण्याच्या हद्दीतील तीन सोनसाखळी चोरीच्या गुन्ह्यातील मुद्देमाल असा लाखो रुपयांचा ऐवज हस्तगत केल्याची माहिती कासारवडवली पोलिसांनी दिली.