ठाणे : शिंदे गटाचे आठ ते दहा आमदार उद्धव ठाकरे यांच्या संपर्कात असल्याचे वक्तव्य विनायक राऊत यांनी केले होते. मात्र या केवळ वावड्या असून ठाकरे गटाचेच काही आमदार मुख्यमंत्र्यांच्या संपर्कात असून लवकरच स्फोट होईल असा दावा आमदार प्रताप सरनाईक यांनी केला आहे. दुसरीकडे मंत्रिपदावरून दोन आमदारांमध्ये संघर्ष झाला असल्याच्या बातम्या टीआरपी वाढवण्यासाठी पेरल्या जात असून सरकार चांगले काम करत असल्याने हे सरकार अस्थिर करण्याचा प्रयत्न सुरु असल्याचे त्यांनी सांगितले. भविष्यात शिवसेना, भाजप आणि राष्ट्रावादी काँग्रेस एकत्र निवडणूक लढणार असल्याचे त्यांनी स्पष्ट केले.
ठाण्यातील समता नगर परिसरातील घरांच्या संदर्भात शिवसेनेचे आमदार प्रताप सरनाईक यांनी पालिका आयुक्त अभिजित बांगर यांची भेट घेतली. त्यावेळी प्रसार माध्यमांशी बोलताना त्यांनी ही प्रतिक्रिया दिली आहे. अजित पवार यांच्य्या सरकार मधील प्रवेशानंतर शिवसेनेच्या गोटात अस्वस्थता निर्माण झाली असल्याची चर्चा आहे. मात्र यामध्ये कोणत्याच प्रकारचे तथ्य नसल्याचे सरनाईक यांनी सांगितले. मुख्यमंत्र्यांच्या निवासस्थानी झालेल्या बैठकीत सर्व आमदारांनी आपल्या मतदार संघातील विकासकांमाच्या संदर्भात चर्चा केली असून कोणत्याच मतदार संघात निधी अभावी विकास कामे थांबणार नाही अशी ग्वाही स्वतः मुख्यमंत्र्यांनी दिली असून त्यामुळे आमदार नाराज होण्याचा प्रश्नच उद्भवत नसल्याचे त्यांनी स्पष्ट केले. ठाकरे गटाचेच आणखी काही आमदार मुख्यमंत्र्यांच्या संपर्कात असल्याचा दावा सरनाईक यांनी यावेळी केला.
मंत्रीमंडळाचा विस्तार झाल्यास सरनाईक यांना मंत्रीपद मिळण्याच्या चर्चा होत्या. मात्र मला मंत्रिपद मिळणार हे कोणत्या ज्योतिषाने सांगितले असा उलट प्रश्न सरनाईक यांनी प्रसार माध्यमांना केला. दुसरीकडे सत्तेत वाटेकरी वाढले असले तरी एकनाथ शिंदे आणि देवेंद्र फडणवीस यांच्या सोबत गेले अनेक वर्ष काम करत असून हे दोन्ही नेते शब्द पाळणारे नेते असल्याचे त्यांनी सांगितले.