अंबरनाथ : पूर्व भागातील एका गुन्हेगाराला शिवाजीनगर पोलिसांनी अटक केली आहे. त्याच्याकडून एक पिस्तूल आणि चार काडतुसे ताब्यात घेण्यात आली आहेत.
शहरातील महालक्ष्मीनगर परिसरात राहणारा संजय पाटील याच्या विरोधात पोलीस ठाण्यात अनेक गुन्हे दाखल आहेत. तो पोलिसांना गुंगारा देत होता. तो अंबरनाथमध्ये पुन्हा गुन्हा करण्याच्या तयारीत असल्याची माहिती पोलिसांना मिळाली होती. त्यामुळे पोलीस त्याचा शोध घेत होते. अंबरनाथ पूर्व भागात पोलीस त्याला अटक करण्यासाठी गेले असता, तो पुन्हा पळण्याच्या तयारीत होता. पोलिसांनी त्याचा पाठलाग करत त्याला अटक केली. यावेळी त्याच्याकडे देशी पिस्तूल आणि चार काडतुसे सापडली.
दरम्यान, पोलीस त्याच्या गुन्ह्याचा तपास करीत असताना त्याने पोलिसांना धमकावल्याची माहिती मिळाली आहे. एवढेच नव्हे तर पोलिसांचा लॅपटॉपही आपटल्याचे सांगण्यात येत आहे. मात्र, पोलीस ठाण्यातील आरोपीच्या या दहशतीची माहिती पोलीस प्रशासन देत नाहीत.
----------