कल्याण : केडीएमसी मुख्यालयातील स्वातंत्र्यवीर विनायक दामोदर सावरकर सभागृहाच्या छताचे पीओपी कोसळल्याची घटना १२ जुलै २०१७ ला घडली होती. या घटनेची गांभीर्याने दखल घेऊन दोषी अधिकाऱ्यांवर कडक कारवाई होईल, असा अंदाज वर्तविला जात होता. परंतु, याप्रकरणी झालेल्या चौकशीत हलगर्जीचा ठपका ठेवत संबंधित अधिकाऱ्यांना केवळ समज देण्यात आली. महत्त्वाचे म्हणजे छत कोसळल्याच्या घटनेला सोमवारी चार वर्षे झाली तरी या सभागृहाच्या नूतनीकरणाचे काम पूर्ण झालेले नाही.
मुख्यालयातील महापालिका भवन इमारतीत चौथ्या मजल्यावरील या सभागृहात महासभेसह मोठ्या बैठका होतात. पीओपी कोसळल्याच्या घटनेआधी या सभागृहात ७ जुलै २०१७ ला तहकूब महासभा झाली होती. तर, १२ जुलैला विधिमंडळ सदस्यांची या सभागृहात बैठक होणार होती. त्या पार्श्वभूमीवर ११ जुलैला सायंकाळी या सभागृहाची पाहणी करून ते बैठकीसाठी सज्जही ठेवले होते. परंतु, १२ जुलैच्या सकाळी ९ वाजता सभागृहाच्या छताचे पीओपी सांगाड्यासह खालील आसनव्यवस्थेवर कोसळले. सभागृह बंद असल्याने कोणतीही जीवितहानी झाली नाही. परंतु, या घटनेमुळे महापालिकेचा बांधकाम विभाग आणि देखभाल दुरुस्ती करणारा कंत्राटदार वादात सापडले होते.
छत कोसळल्याच्या घटनेची चौकशी तत्कालीन अतिरिक्त आयुक्त संजय घरत यांच्याकडे सोपविली होती. मागील १५ वर्षांच्या कालावधीत असलेले बांधकाम विभागातील कार्यकारी अभियंता आणि उपअभियंता यांची माहिती सामान्य प्रशासन विभागाकडून मागविली होती. १५ वर्षांतील तपशील तपासला गेल्याने हलगर्जी नेमकी कोणाची? छत कोसळल्याचा ठपका नेमका ठेवायचा तरी कोणावर? या संभ्रमात प्रशासन होते. अखेर यातून केवळ ‘समज’ देण्यापुरतीच कारवाई झाली. यावर नगरसेवकांनीही त्यावेळी मौन बाळगल्याने एकूणच पीओपी कोसळल्याच्या घटनेचे त्यांनाही कितपत गांभीर्य होते, हे देखील त्यातून पुढे आले.
दुसरीकडे सभागृहाच्या नूतनीकरणाचे काम सुरू होण्यासही विलंब झाला. दोन वर्षांनंतर सभागृहाच्या नूतनीकरणाच्या कामाला सुरुवात झाली. दरम्यान, या छत कोसळण्याच्या घटनेला सोमवारी चार वर्षे झाली असताना नूतनीकरणाचे काम अद्याप पूर्ण झालेले नाही. यातून महापालिकेचा उदासीन कारभार चव्हाट्यावर आला आहे.
-------------
नूतनीकरणाचे काम अंतिम टप्प्यात
लॉकडाऊनमुळे मजूर मिळत नव्हते. त्यामुळे काम काही महिने होऊ शकले नाही. त्यात फिनिशिंग मटेरियल बाहेरून मागविण्यात येणार आहे. कुशल कामामुळे विलंब लागत आहे. परंतु, सभागृहाच्या नूतनीकरणाचे काम अंतिम टप्प्यात आहे.
- सपना देवनपल्ली-कोळी, शहरअभियंता, केडीएमसी
----