लोकमत न्यूज नेटवर्क
ठाणे : मुंब्य्रातील प्राईम क्रिटीकेअर रुग्णालयाला लागलेल्या आगीनंतर शहरातील खासगी रुग्णालयांची अग्निसुरक्षा पुन्हा ऐरणीवर आली होती. ठाणे महापालिकेच्या अग्निशमन विभागाने शहरातील ३४७ रुग्णालयांना पुन्हा नोटीस बजावत अग्निसुरक्षा सक्षम करण्यास सांगितले आहे. परंतु, आता राज्य सरकारने कोविडच्या पार्श्वभूमीवर अग्निसुरक्षा नसली तरी रुग्णालय ३१ ऑगस्टपर्यंत सुरू ठेवण्याची परवानगी द्यावी, असे स्पष्ट केले आहे. त्याच धर्तीवर आता ठाणे महापालिकेनेही ‘बी’ फॉर्मच्या आधारावर या रुग्णालयांना तूर्तास ऑगस्ट २०२१ पर्यंत दिलासा दिला आहे.
ठाणे महापालिकेच्या बुधवारी झालेल्या महासभेत राष्ट्रवादीचे नगरसेवक सुहास देसाई यांनी या संदर्भात मुद्दा उपस्थित केला होता. शहरातील खासगी रुग्णालयाच्या परवानगीबाबत काय निर्णय घेतला आहे, फायर एनओसीसाठी काही तारीख वाढवून दिली आहे का, असा प्रश्न विचारला.
ठाणे शहरात सरकारी, महापालिका रुग्णालये व आरोग्य केंद्रांची संख्या ३४ च्या आसपास आहे, तर एकूण ४३७ रुग्णालये शहरात आहेत. मुंब्रा शहरातील रुग्णालय दुर्घटनेनंतर ठामपाने शहरातील सर्व रुग्णालयांना पुन्हा नोटिसा बजावत अग्निसुरक्षा सक्षम करण्याच्या सूचना दिल्या होत्या. त्यात २८२ रुग्णालयांमध्ये अग्निशमन यंत्रणा सक्षम असल्याचे उघडकीस आले होते. ३४ खासगी रुग्णालये बंद असल्याचे, तर ६५ रुग्णालयांमध्ये अग्निसुरक्षा यंत्रणाच नसल्याची बाबही पुढे आली होती. या ६५ रुग्णालयांना नोटिसा बजावून अग्निशमन सुरक्षा यंत्रणा बसविण्याचे आदेश अग्निशमन दलाने दिले होते. मात्र, त्याकडे या रुग्णालयांनी अद्यापही दुर्लक्ष केले होते.
परंतु, आता कोरोनाचा वाढता धोका लक्षात घेता अशा रुग्णालयांना आता राज्य सरकारनेच ३१ ऑगस्टपर्यंत सुरू ठेवण्याची परवानगी दिली आहे. त्याचाच आधार घेत ठाणे महापालिकेच्या आरोग्य विभागानेही शहरातील अशा रुग्णालयांना फायर एनओसी नसली तरी देखील ‘बी’ फॉर्मच्या आधारावर ३१ ऑगस्ट २०२१ पर्यंत परवानगी देण्यात येत असल्याचे स्पष्ट केले आहे.
----------------