बदलापूर : कुळगाव बदलापूर नगरपालिका निवडणुकीच्या पार्श्वभूमीवर राष्ट्रीय समाज पक्षानेही जोरदार मोर्चेबांधणी केली असून या निवडणुकीत राष्ट्रीय समाज पक्ष खाते उघडणार असल्याचा दावा पक्षाचे राष्ट्रीय अध्यक्ष एस. एल. अक्कीसागर यांनी केला आहे.
माघी गणेशोत्सव निमित्त अक्कीसागर यांनी नुकतेच बदलापुरातील स्टेशन पाडा माघी गणेशोत्सव मंडळाच्या गणपतीचे दर्शन घेतले. त्यानंतर पत्रकारांशी बोलताना त्यांनी आगामी पालिका निवडणुकीत राष्ट्रीय समाज पक्ष चांगली कामगिरी करेल असा दावा केला. राष्ट्रीय समाज पक्षाने गेल्या चार वर्षांपासून पालिका निवडणुकीसाठी जिल्हाध्यक्ष रुपेश थोरात यांच्या नेतृत्वाखाली नियोजबद्ध तयारी केली आहे. लॉकडाऊन काळात अडचणीत असलेल्या नागरिकांच्या मदतीसाठी येणारे इतर राजकीय पक्षांचे कार्यकर्ते वाटपाचे फोटो काढत होते. मात्र थोरात यांनी असे फोटो काढणे कटाक्षाने टाळून अडचणीत असलेल्या माणसाला मदत करणे हे कर्तव्य मानून मदतीचा हात दिला. याबद्दल त्यांनी थोरात यांचे विशेष कौतुक केले.
पालिका निवडणुकीत उमेदवारी देताना राष्ट्रीय समाज पक्ष सोशल इंजिनिअरिंग पॅटर्न राबवणार असल्याचेही अक्कीसागर यांनी स्पष्ट केले. पक्षात सर्व समाजाचे पदाधिकारी व कार्यकर्ते आहेत. त्यामुळे उमेदवारी देताना सर्व समाज घटकांना समान संधी मिळावी,असा प्रयत्न राहणार असल्याचे त्यांनी सांगितले. रासपचे किती उमेदवार निवडून येतील हे निकालानंतर स्पष्ट होईलच. परंतु या निवडणुकीत रासप खाते उघडणार हे मात्र नक्की,असा दावा त्यांनी केला.