मीरारोड - वर्दळीच्या रस्त्यावर फटाके फोडण्या वरून दोन गटात झालेल्या राड्या नंतर पोलिसांनी ५ जणांना अटक केली आहे . भाईंदर पूर्वेच्या नवघर मार्गावर वर्दळीच्या ठिकाणी दीपक दास , सामंता बाघ व यश बाघ हे फटाके फोडत होते . त्यावेळी रस्त्यावरून दुचाकीने जाणाऱ्या एकाने रस्त्यावर बॉम्ब का फोडता असे बोलत शिवीगाळ केली . त्यावरून त्यांच्यात वाद झाला .
अल्पवयीन असलेल्या यश याच्या फिर्यादी वरून तिघा जणांनी मारहाण , शिवीगाळ केली . लाकडी टेबल मारले . तसेच बर्फ तोडण्याच्या तीक्ष्ण हत्याराने वार केले . पोलिसांनी तिघा अनोळखी व्यक्तींवर गुन्हा दाखल करून आबिद व साबीद रा . क्रिस्टक्राऊन , आझाद नगर ह्या दोघा भावांना अटक केली आहे .
तर आबिद याच्या फिर्यादी वरून , ते नागोरी हॉटेल येथून जात असताना हे तीन मुले रस्त्यात बॉम्ब फोडत असल्याने त्यांना रस्त्यात बॉम्ब फोडू नका असे सांगितले असता बाचाबाची झाली . त्याच्या दुकानासमोर २५ - ३० जण जमले . त्यातील ३ - ४ जणांनी मिळून आबिद सह सादिक व सादिक , साबीद ह्या भावना शिवीगाळ , दमदाटी करत मारहाण केली . एकाने साबीद च्या डोक्यात लोखंडी रॉड मारला .
पोलिसांनी आबिद च्या फिर्यादी नुसार यश घनश्याम बाघ रा . जेसलपार्क ; सामंता बाघ , दीपक दास व रॉबिन तांडी तिघेही रा . हरिश्चंद्र नगर ह्या चौघांवर गुन्हा दाखल करत सामंता , दीपक आणि रॉबिन ह्या तिघांना अटक केली आहे . २८ ऑक्टोबर रोजी गुन्हा दाखल करून ५ जणांना अटक केली असून वरिष्ठ पोलीस निरीक्षक धीरज कोळी यांच्या मार्गदर्शनाखाली पोलीस अधिक तपास करत आहेत .
सार्वजनिक वर्दळीच्या ठिकाणी फटाके विक्री आणि फोडण्यास मनाई आहे . रहदारीच्या ठिकाणी फटाके फोडून वा फटका स्टॉल लावून येणाऱ्या - जाणाऱ्या लोकांच्या जीवितास तसेच मालमत्तेस हानी होण्याची भीती असून देखील सर्रास फटाके फोडले जात असल्याचे व मोठ्या साठ्याने विक्री स्टॉल लावल्या बद्दल जागरूक नागरिकांनी संताप व्यक्त केला आहे .