लोकमत न्यूज नेटवर्क
मीरारोड : मुसळधार लावलेल्या पावसाने मीरा-भाईंदरकरांची झोप उडवली. शहरात सर्वत्र पूरस्थिती निर्माण झाली असून, घरात पाणी शिरले आहे. तर दुर्घटना घडू नये म्हणून वीजपुरवठा खंडित करण्यात आला. अग्निशमन दलाने पाण्यात अडकलेल्या ६९ जणांची सुटका केली. महाजनवाडी येथे पाण्याच्या लोंढ्याने एका घराची पडझड, तर २० ते २२ दुचाकी वाहून गेल्या.
शनिवारच्या मध्यरात्रीपासून पावसाने ‘जाेर’धार लावल्यामुळे घरात गुडघाभर पाणी साचल्याने लोकांना रात्र जागून काढावी लागली. शहरातील महाजन वाडी, काशिमीरा, सिल्व्हर पार्क, विजय पार्क, चंद्रेश, शांतीनगर, शीतलनगर, कृष्ण स्थळ, विनय पार्क, सिल्व्हर सरिता, पटेल कम्पाउंड, खारीगाव, तलाव मार्ग, बेकरी गल्ली, विनायकनगर, नवघर मार्ग, गोडदेवसह अन्य अनेक भागांत मोठ्या प्रमाणात पाणी साचले होते. रात्रीपासून सकाळपर्यंत अनेक ठिकाणी पाणी उपसा करणारे पालिकेचे पंप सुरू नव्हते. पाण्यात अडकलेले अनेक नागरिक पंप सुरू करा म्हणून प्रयत्न करत होते. घरातील धान्य, विजेची उपकरणे यांची नासधूस झाली आहे. शहरातील अनेक रस्ते तर पाण्याखाली गेले होते. इमारतीतील पाण्याच्या टाक्यांमध्ये दूषित पाणी शिरल्याने अनेकांना पाण्यावाचून राहावे लागले. औद्योगिक वसाहती व दुकानांमध्ये पाणी शिरून नुकसान झाले.
महाजनवाडी येथे तर संजय गांधी राष्ट्रीय उद्यान मधील डोंगरांवरून पाण्याचा प्रचंड लोंढा वाहत होता. पाण्याचा वेग इतका होता की, सुमारे २० ते २२ दुचाकी वाहून गेल्या. गावदेवी कम्पाउंड, गायत्री चाळीमधील रामू पाटील यांच्या घराची या लोंढ्याने पडझड झाली. लोकांचे सामान वाहून गेले. पाण्याच्या लोंढ्यात अडकलेल्या ५२ जणांची अग्निशमन दलाने सुटका केली. माशाचा पाडा मार्ग परिसरातही डोंगरावरून आलेल्या पाण्याच्या पूरस्थिती बिकट बनली होती.
मुंबई-अहमदाबाद महामार्गही पाण्याखाली गेला होता. महामार्गावर एका मोटारकारमध्ये अडकलेल्या चौघांना अग्निशमन दलाने वाचविले. गायत्री इमारतीच्या तळ मजल्यातून पाण्यात अडकलेल्या पाच जणांची अग्निशमन दलाने सुटका केली. सिल्वर सरिता इमारतीमधून पाच जण तर येथील एका दूध टँकरमधून तीन जणांची सुटका केल्याचे अग्निशमन दलाचे प्रमुख प्रकाश बोराडे यांनी सांगितले. सकाळपर्यंत अनेक भागांतील पाणी उतरले नव्हते. लोक नगरसेवकांना शोधत शिमगा करत होते. काही नगरसेवक रात्रीपासून लोकांच्या संपर्कात होते. सकाळी महापौर ज्योत्स्ना हसनाळे, आयुक्त दिलीप ढोले आदींनी शहरात फिरून आढावा घेतला.
बेकायदा बांधकामांमुळे घात
संजय गांधी राष्ट्रीय उद्यानातील डोंगराळ भागातून पाण्याचे लोंढे येत असताना महाजन वाडी, माशाचा पाडा मार्ग परिसरात नैसर्गिक ओढ्यांमध्ये बेकायदा बांधकामे झाली आहेत. शहरातील खाड्या व नैसर्गिक नाल्यांवर भराव करून बांधकामे उभी राहिली आहेत. शहराची कवचकुंडले असलेल्या कांदळवन, पाणथळ, सीआरझेड भागात भराव आणि बांधकामे झाल्याने पाण्याचा निचरा होणारे मार्ग व वॉटरहोल्डिंग क्षेत्र नष्ट झाल्याने शहरात पूरस्थिती होत असल्याचे जाणकारांचे म्हणणे आहे. त्यामुळे ही बांधकामेच पूरस्थितीला कारणीभूत असल्याचा आरोप होत आहे.