ठाणे : कोरोना रोखण्यासाठी ठामपाकडून विविध उपाययोजना केल्या जात आहेत; परंतु मागील काही दिवसांत रुग्णांची संख्या चार ते पाच पटीने वाढली आहे. त्यामुळे शहरातील कोविड सेंटरमध्ये आता बेडची संख्याही कमी होत आहे. ठामपा हद्दीत सध्या १२,९८३ रुग्णांवर उपचार सुरू आहेत. त्यातील ८० टक्के रुग्ण घरी उपचार घेत असले तरीही रुग्णालयांतील ८० टक्के बेड भरलेले आहेत, तर खासगी रुग्णालयांत बेड मिळविण्यासाठी रुग्णांच्या कुटुंबीयांना तारेवरची कसरत करावी लागत आहे. त्यातही आता जोखमीच्या रुग्णांची संख्या वाढत असल्याने आयसीयूचे आठ टक्केच बेड शिल्लक आहेत.
ठामपा हद्दीत दररोज १५०० ते १८०० रुग्ण आढळत आहेत. सध्या १२,९८३ रुग्णांवर उपचार सुरू असून, यातील ३२९४ रुग्ण हे विविध रुग्णालयांत दाखल आहेत, तर यातील ९२८१ रुग्ण हे घरीच विलगीकरणात आहेत. एकूण रुग्णांतील ९७४६ रुग्णांना कोणतीही लक्षणे नाहीत, तर २७०९ रुग्णांमध्ये सौम्य लक्षणे आहेत. ५२८ रुग्ण अत्यवस्थ असून, ते आयसीयूमध्ये उपचार घेत आहेत, तर ५७ रुग्ण हे व्हेंटिलेटरवर आहेत. त्यामुळे एकूण ४१२२ बेडपैकी ३२९४ बेड फुल्ल झाले आहेत. केवळ ८२८ बेड विविध रुग्णालयांत उपलब्ध आहेत. त्यानुसार शहरात सध्या केवळ २० टक्केच बेड शिल्लक आहेत.
ठामपाच्या ग्लोबल कोविड सेंटरमधील बेड फुल्ल झाले आहेत. त्यामुळे मनपाला आता ज्युपिटर येथील दुसऱ्या कोविड सेंटरकडे मोर्चा वळवावा लागला आहे. तेथे ४०० हून अधिक रुग्ण उपचार घेत आहेत. त्यातही सर्वसाधारण ११९४ बेडपैकी ६३९ बेड भरलेले असून, ५५५ बेड शिल्लक आहेत, तर ऑक्सिजनचे २३५७ बेडपैकी २०७० बेड फुल्ल असून, २८७ बेड शिल्लक आहेत. याचाच अर्थ ऑक्सिजनचे १२ टक्केच बेड शिल्लक आहेत, तर आयसीयूचे ५७१ पैकी ५२८ बेड भरलेले असून, आता केवळ आठ टक्केच बेड शिल्लक आहेत. व्हेंटिलेटरचे २२६ पैकी ५७ बेड भरलेले असून, १६९ बेड शिल्लक आहेत.
ठामपा करतेय २५०० बेडची व्यवस्था
- ठामपाकडून आणखी २५०० बेडची व्यवस्था करण्यात येत आहे. मात्र, तोपर्यंत रुग्णांना बेडसाठी तारेवरची कसरत करावी लागत आहे. खासगी रुग्णालयात बेड मिळावा यासाठी रुग्णांच्या नातेवाइकांचे शर्तीचे प्रयत्न सुरू असतात. परंतु, तेथे बेड मिळणे कठीण झाले आहे.
- ठाणे जिल्हा शासकीय रुग्णालयातील बेडही १०० टक्के फुल्ल झाल्याने रुग्णांना बेड मिळवण्यासाठी कसरत करावी लागत आहे. त्यातही रुग्ण दिवसागणिक वाढत असल्याने दोन दिवसांत शिल्लक बेडही फुल्ल होतील, असे सांगितले जात आहे. त्यानंतर मात्र काय, असा सवाल उपस्थित होत आहे.
--------------