ठाणे : सध्या राज्यभर कोरोना विषाणूने थैमान घातलेले आहे. त्यात मुंबई, ठाणे जिल्ह्यांत दिवसेंदिवस कोरोनाबाधितांची संख्या वाढत आहे. कोरोनामुळे मृत्यूचे प्रमाणही वाढत आहे. अशा परिस्थितीत अन्न, नागरीपुरवठा विभागांतर्गत येणाऱ्या नियंत्रक शिधावाटप व संचालक नागरीपुरवठा यांचे आस्थापनेवरील कर्मचारी, अधिकारी बदलापूर, कल्याण, विरार, पनवेल, अशा अनेक दूरवरच्या ठिकाणांवरून प्रवास करणारे चार हजार २२३ शिधावाटप दुकानांवरील एक हजार ५० अधिकारी, कर्मचारी कोरोनाच्या लसीकरणपासून वंचित असल्याचा आरोप मुंबई शिधावाटप कर्मचारी संघटनेचे अध्यक्ष रामराजे भोसले व सरचिटणीस विनायक निकम यांनी केला आहे.
कोरोनाच्या या महामारीत सातत्याने हे अधिकारी, कर्मचारी प्रचंड लोकसंख्या असलेल्या शहरातील जनतेपर्यंत चार हजार २२३ शिधावाटप दुकानांमार्फत अन्नधान्याचा पुरवठा करीत आहेत. या सर्व शहरांना कोरोना विषाणूचा विळखा पडलेला असताना ते जीव मुठीत घेऊन जनतेपर्यंत अन्नधान्य पोहोचविण्याचे कर्तव्य प्रत्यक्ष कार्यक्षेत्रात उपस्थित राहून पार पाडत आहेत. संपूर्ण लॉकडाऊनच्या काळात अपुरे मनुष्यबळ असतानाही काम करणारे हे कर्मचारी, अधिकारी अद्याप लसीकरणापासून वंचित असल्याचे भोसले म्हणाले.
-अपुऱ्या मनुष्यबळात चोख सेवा
शिधावाटप यंत्रणेत सहायक नियंत्रक शिधावाटपची सात पदे मंजूर असून, ती गेल्या तीन वर्षांपासून रिक्त आहेत. शिधावाटप अधिकारी हे कार्यालयप्रमुख पदांमधील ६० पदांपैकी २७ पदे रिक्त आहेत, तर सहायक शिधावाटप अधिकाऱ्यांची १६ पदे रिक्त आहेत. शिधावाटप यंत्रणेचा कणा समजल्या जाणाऱ्या शिधावाटप निरीक्षकांची २५३ इतकी पदे रिक्त आहेत व इतर कर्मचाऱ्यांची ४४८ पदे रिक्त आहेत. संपूर्ण शिधावाटप यंत्रणेत एक हजार ८९० पदांपैकी ७५१ एव्हढी पदे रिक्त आहेत. शासनाकडे वारंवार पत्रव्यवहार करूनही अद्याप रिक्त पदे भरलेली नाहीत.
-अपात्र शिधापत्रिका शोधमोहीम थांबवा
-- कोरोनाची गंभीर परिस्थिती असताना अपात्र शिधापत्रिका शोधमोहीमदेखील कर्मचारी/ अधिकाऱ्यांच्या माथी मारली जात आहे. तूर्तास या अपात्र शिधापत्रिका शोधमोहीम राबविण्यात येऊ नये, अशी मागणी संघटनेच्या वतीने अन्न, नागरी पुरवठा व ग्राहक संरक्षण विभागाच्या सचिवांकडे केली आहे, असे त्यांनी सांगितले.