ठाणे : कोरोनाचा वाढता संसर्ग लक्षात घेता ठाणे पोलिसांच्या वतीने शहरातील ४०५ हॉटेल, बार, ढाबे, पब, मॉल्स आदींना नोटिसा बजावल्याची माहिती अतिरिक्त पोलीस आयुक्त अनिल कुंभारे यांनी दिली. या नोटिसीद्वारे सोशल डिस्टन्सिंगचे पालन करण्याच्या सूचना देण्यात आल्या आहेत. कोरोनाबाबत जे नियम घालून देण्यात आले आहेत, त्याचे पालन न झाल्यास कायदेशीर कारवाई करण्याचा इशाराही त्यांनी दिला.
रुग्णांची वाढती संख्या नजरेसमोर ठेवून करण्यात येत असलेल्या उपाययोजनांची माहिती देण्यासाठी महापालिकेच्या नागरी संशोधन केंद्रात आयोजित केलेल्या पत्रकार परिषदेत ते बोलत होते. यावेळी महापालिका आयुक्त डॉ. विपीन शर्मा हेदेखील उपस्थित होते. यावेळी पालिका आणि पोलिसांच्या मदतीने कोरोना रोखण्यासाठी महत्वाची पावले उचलण्यात आल्याचेही त्यांनी स्पष्ट केले. शहरात गर्दीच्या १०५ ठिकाणांवर भोंग्याद्वारे सूचना दिल्या जात असून सोशल डिस्टन्सिंगचे पालन करणे, स्क्रिनिंग करणे, तसेच सॅनिटायझरचा वापर करण्याबरोबर मास्कचा वापर करण्याचे आवाहन या माध्यमातून केले जात असल्याचेही त्यांनी सांगितले. याशिवाय मास्कचा वापर न करणाऱ्यांविरोधात दंडाची मोहीम हाती घेण्यात आली असून तशा सूचना वाहतूक पोलिसांना केल्या आहेत. याशिवाय सध्या हॉटेल, बार, रेस्टॉरंट, मॉल, मोठी दुकाने, मंगल कार्यालये, पब, ढाबे आदी ठिकाणी सोशल डिस्टन्सिंगचे पालन होत नसल्याचे दिसून आले आहे. त्यामुळे अशा प्रकारच्या ४०५ आस्थापनांना नोटिसा बजावल्याचेही त्यांनी सांगितले. या नोटिसीद्वारे प्रत्येक आस्थापनाने सोशल डिस्टन्सिंगचे पालन करावे, सॅनिटायझरचा वापर करावा, गर्दी होणार नाही याची काळजी घ्यावी, स्क्रिनिंग करण्यात यावे आदी महत्वाच्या सूचना देण्यात आल्या आहेत. या सूचनांचे पालन न केल्यास संबंधित आस्थापनांवर नियमानुसार कारवाई करण्याचा इशाराही त्यांनी यावेळी दिला. आयुक्त शर्मा यांनीदेखील मंगल कार्यालये किंवा मॉल्स, हॉटेल, बार आदी ठिकाणी गर्दी होत असल्याचे सांगितले आहे. परंतु पोलिसांनी बजावलेल्या नोटिसीनुसार आस्थापनांनी नियमांचे पालन केले नाही, तर त्यांच्याविरोधात गुन्हे दाखल करण्याबरोबर त्या आस्थापना सील करणार असल्याचे त्यांनी स्पष्ट केले. वेळप्रसंगी त्यांचेदेखील परवाने रद्द करण्याचा इशारा त्यांनी दिला.