भिवंडी : मित्रांमध्ये मस्करी सुरू असताना ‘ये लंबू’ म्हटल्यामुळे आरोपी मित्राने मित्राची चाकूने भोसकून भररस्त्यात हत्या केली. भिवंडीतील नुरीनगर परिसरात सोमवारी रात्री ही घटना घडली. मोहम्मद अजगर शेख ऊर्फ सन्नाटा (वय २०) असे मृताचे नाव आहे. त्यानंतर हल्ला करणाऱ्या समीर शेख (वय २१, रा. आझादनगर) याला नागरिकांनी केलेल्या मारहाणीत तो गंभीर जखमी झाला आहे.
काही दिवसापूर्वी माेहम्मद व समीर यांच्यात काही कारणावरून वाद होऊन भांडण झाले होते. त्यातच सोमवारी रात्री अजगर याने आरोपी समीर यास ‘ये लंबू’ म्हणून जोराने आवाज दिला. यावरून दोघांमध्ये वाद होऊन झटापट झाली. त्यावेळी आरोपीसह त्याच्या साथीदारांनी भररस्त्यात मोहम्मदला मारहाण करून त्याच्यावर चाकूने वार केले. ही घटना पाहून परिसरातील जमावाने आरोपी समीरला पकडून जबर मारहाण केली. शांतिनगर पोलिसांनी हत्येचा गुन्हा दाखल करून याप्रकरणी समीरसह एकास ताब्यात घेतले आहे. त्यांचा एक साथीदार फरार आहे. दरम्यान, मुंबईतील सायन येथील रुग्णालयात मुख्य आराेपीवर उपचार सुरू आहेत.