मीरारोड : केंद्र सरकारच्या सफाईमित्र सुरक्षा चॅलेंज २०२१ अंतर्गत मीरा भाईंदर महापालिकेकडून सफाई मित्र व जनजागृती अभियानात सहभागी विद्यार्थ्यांचा सन्मान करण्यात आला.
शहरी विकास मंत्रालय भारत सरकारमार्फत १९ नोव्हेंबर २०२० पासून देशातील २४३ शहरांमध्ये सफाईमित्र सुरक्षा चॅलेंज अभियान सुरू करण्यात आले आहे. मलनिस्सारण वाहिनी, सेप्टिक टँक व मॅनहोलमध्ये कार्यरत कामगारांना सफाईसाठी अधिकृत आणि शाश्वत यंत्रणेमध्ये समावेश करून घेणे हा मुख्य उद्देश या अभियानाचा आहे. जीवितहानी टाळण्यासाठी मलनिस्सारण वाहिनी, सेप्टिक टँक व मॅनहोलमध्ये मानवी वापर कमी करून यांत्रिकीकरणाच्या साफसफाईला प्रोत्साहन देण्यावर भर असणार आहे.
सफाईमित्रांनी केलेल्या कामाचा सन्मान करण्याकरिता शुक्रवारी ३० जुलै रोजी मीरारोडच्या जीसीसी क्लब येथे सन्मान सोहळा आयोजित केला होता. यावेळी महानगरपालिका आयुक्त दिलीप ढोले, उपायुक्त संभाजी पानपट्टे, सहायक आयुक्त सचिन बच्छाव, शहर अभियंता शिवाजी बारकुंड, कार्यकारी अभियंता दीपक खांबित, सुरेश वाकोडे, किरण राठोड व जनसंपर्क अधिकारी राजकुमार घरत, शहरी विकास मंत्रालयाचे प्रतिनिधी उपस्थित होते.
सफाईमित्र सुरक्षा चॅलेंज २०२१ अंतर्गत पाणी पुरवठा विभागाद्वारे सुरु करण्यात आलेल्या सफाईमित्र उद्यमीकरण आणि उन्नतीकरण प्रोत्साहन योजना, सफाईमित्र इंटर्नशिप प्रोग्रॅम, सफाईमित्र चित्रकला सप्ताह आदी उपक्रम राबवले. सफाईमित्रांना युनिफॉर्म, सुरक्षा किट आणि प्रमाणपत्र त्यासोबतच स्मृतिचिन्ह आणि प्रशस्तीपत्र, शाळकरी विद्यार्थ्यांना प्रमाणपत्र वाटपाचा कार्यक्रम झाला.
शहरी विकास मंत्रालयाच्या सूचनेनुसार या कार्यक्रमामध्ये लोन मेळावादेखील आयोजिला होता. त्यात महात्मा फुले मागासवर्गीय महामंडळ आणि राष्ट्रीयीकृत बँकेचे अधिकारी सहभागी झाले होते. पाणी पुरवठा विभागद्वारा सफाईमित्र सुरक्षा चॅलेंजअंतर्गत राबविल्या गेलेल्या विविध संकल्पनांचा लेखाजोखा अप-रायझिंग : आपला मित्र, सफाईमित्र या पुस्तकाचे प्रकाशन आयुक्तांच्या हस्ते करण्यात आले.
सफाईमित्र इंटर्नशिप प्रोग्रामद्वारे जनजागृतीसाठी महाविद्यालयीन विद्यार्थ्यांना इंटर्नशिप देऊन युवकांचा या अभियानामध्ये सक्रिय सहभाग करून घेतला जात आहे. लॉकडाऊन आणि कोरोना परिस्थिती असतानादेखील पाणी पुरवठा विभागाद्वारे ‘सफाईमित्र ऑनलाइन टॉक सिरीज’ सुरू करण्यात आली.
केंद्र सरकारच्या सफाईमित्र सुरक्षा च`लेंज अभियानअंतर्गत मीरा भाईंदर महानगरपालिकेमार्फत सेप्टिक टँक, मलनिस्सारण वाहिनी, मॅनहोल संबंधित तक्रार नोंदविण्यासाठी टोल फ्री क्रमांक १४४२० आणि व्हॉटसॲप क्रमांक ८६५७९०६८८० सुरू करण्यात आलेले आहे. नागरिकांनी तक्रार नोंदणीसाठी या क्रमांकावर संपर्क साधण्याचे आवाहन आयुक्त ढोले यांनी केले आहे.