ठाणे : घोडबंदर रोड, काजूपाडा येथून मोटारसायकलवरून जाणाऱ्या मोहित शर्मा (२२, रा. मानपाडा, ठाणे) याला पाठीमागून आलेल्या ट्रकने धडक दिल्याने तो गंभीर जखमी झाल्याची घटना सोमवारी पहाटेच्या सुमारास घडली. याप्रकरणी अज्ञात ट्रकचालकाविरुद्ध कासारवडवली पोलीस ठाण्यात मंगळवारी गुन्हा दाखल झाला आहे.
ठाण्याच्या मानपाडा, आकाशगंगा चाळीत राहणारे शर्मा हे मित्रांबरोबर गेट टुगेदर करून घोडबंदर रोडवरील फाऊंटन हॉटेल येथे फिरण्यासाठी मोटारसायकलीवरून गेले होते. तिथून ते १९ जुलै रोजी पहाटेच्या सुमारास परत ठाण्याकडे येत असताना काजूपाडा, चायना ब्रिज येथून जात होते. त्याचवेळी पाठीमागून भरघाव आलेल्या एका ट्रकने त्यांना जोरदार धडक दिली. या अपघातात ट्रकचे चाक त्यांच्या डाव्या पायावरून गेल्याने ते फ्रॅक्चर झाले. तर त्यांच्या डाव्या हाताला तसेच कमरेला जबर मार लागला. या अपघातानंतर ट्रकचालकाने मात्र तिथून पलायन केले. सहाय्यक पोलीस निरीक्षक आर. बी. फड हे अधिक तपास करीत आहेत.