सदानंद नाईक
लोकमत न्यूज नेटवर्क
उल्हासनगर : महापालिका निवडणुकीपूर्वी निवड समितीची स्थापना करण्यासाठी रिपाइं आठवले गटाचे राष्ट्रीय कोषाध्यक्ष बी. बी. मोरे यांच्या नेतृत्वाखाली शुक्रवारी बैठक झाली. मात्र, शहर जिल्हाध्यक्ष व उपमहापौर भगवान भालेराव बैठकीला नसल्याने, निवडणुकीपूर्वी पक्षातील वाद चव्हाट्यावर येण्याची शक्यता निर्माण झाली.
उल्हासनगरात रिपाइंची ताकद चांगल्या प्रमाणात असून महापालिकेत पक्षाचे ३ नगरसेवक आहेत. पक्षाचे शहराध्यक्ष व गटनेते भगवान भालेराव हे उपमहापौर असून त्यांच्या नेतृत्वाखाली पक्षाचे काम चालते. महापालिकेच्या निवडणुका फेब्रुवारी महिन्यात होण्याची शक्यता असल्याने पक्षाचे पदाधिकारी बी. बी. मोरे यांच्या नेतृत्वाखाली शुक्रवारी त्यांच्या निवासस्थानी बैठक झाली. निवडणुकीपूर्वी निवड समितीची स्थापना करण्याचा निर्णय घेण्यात आला. पालिका निवडणुकीत पक्षाचे १२ नगरसेवक निवडून आणण्यासाठी प्रयत्न करणार असल्याचे यावेळी मोरे म्हणाले, तसेच निवड समितीस पक्षप्रमुख व केंद्रीयमंत्री रामदास आठवले यांच्याकडून मान्यता घेण्यात येईल, अशी माहिती त्यांनी दिली. बैठकीला प्रदेश सचिव नाना पवार, माजी जिल्हाध्यक्ष व नगरसेवक राजू सोनवणे, जे. के. ढोके, माजी नगरसेवक शांताराम निकम, शहर जिल्हा महासचिव गंगाधर मोहोड, अंबादास गायकवाड, किशोर पवार आदी उपस्थित होते. प्रत्यक्षात पक्षाची जबाबदारी भगवान भालेराव यांच्याकडे दिल्याने, पक्षप्रमुख आठवले निवड समितीला मान्यता देणार का? असा प्रश्न निर्माण झाला आहे, तसेच उल्हासनगरमधील पक्षांतर्गत वादावर काय निर्णय घेतात? याकडेही पक्ष कार्यकर्त्यांचे लक्ष लागले आहे.
---------
शहर रिपाइंची जबाबदारी माझ्याकडे
शहरात रिपाइंची ताकद वाढविण्याची जबाबदारी शहराध्यक्ष म्हणून पक्षप्रमुख रामदास आठवले यांनी माझ्याकडे दिली, अशी प्रतिक्रिया भालेराव यांनी दिली. येत्या दोन दिवसांत नव्या दमाची निवड समिती स्थापन करणार असल्याचे ते म्हणाले.