डोंबिवली : कल्याण-मलंग रस्त्यावर खड्ड्यात पडून सागर राठोड हा तरुण गंभीर जखमी झाल्याची घटना सोमवारी घडली असताना रविवारी डोंबिवलीतील जुने छायाचित्रकार तथा मनसैनिक विवेक भणगे यांची दुचाकी खड्ड्यात आदळल्याने झालेल्या अपघातात त्यांच्या उजव्या पायाला दुखापत झाली आहे. ही घटना ठाकुर्लीतील हनुमान मंदिरपासून म्हसोबा चौकाकडे जाणाऱ्या उतारावरील रस्त्यावर रविवारी दुपारी घडली.
विवेक हे पत्नी स्मिता यांच्यासह दुचाकीवरून डोंबिवली पूर्वेतील सावरकर रोडवरून कल्याण-डोंबिवली रेल्वे समांतर रस्त्याकडे काही कामानिमित्त जात होते. त्यांची दुचाकी म्हसोबा चौकाकडे उतरणाऱ्या रस्त्यावर आली असता तेथील गतिरोधक आणि त्याला लागून असलेल्या खड्ड्यात जोरात आदळली. सुदैवाने त्यांच्या पत्नीला दुखापत झाली नाही. परंतु विवेक यांच्या उजव्या पायाला मार लागला आहे. आमदार प्रमोद (राजू) पाटील यांनी सोशल मीडियावर खड्ड्यांच्या मुद्द्यावर प्रशासनाला धारेवर धरत सहनशक्तीचा अंत झालाय, अशा शब्दात समाचार घेतला आहे. आमदार रवींद्र चव्हाण यांनीही रस्त्यावरील खड्डे भरा, अन्यथा नागरिक मनपाच्या दिशेने दगड भिरकावतील असा इशारा दिला आहे.