कल्याण : केडीएमसीने घनकचरा व्यवस्थापन कर लागू करून त्याची वसुली सुरू केल्याने भाजपने पालकमंत्र्यांना लक्ष्य करीत पोस्टरबाजी केली होती. त्यावर खासदार डॉ. श्रीकांत शिंदे यांनी, पोस्टर कुणीही लावू द्यात, काम फक्त शिवसेना करते. केलेले काम छाती ठोकून सांगण्याची धमक ठेवते, असा टोला भाजप आमदार रवींद्र चव्हाण यांना, त्यांचा नामोल्लेख न करता लगावला आहे.
खा. शिंदे म्हणाले, कोरोना काळात कल्याण, डोंबिवली तसेच लोकसभा मतदारसंघात कोविड जंबो रुग्णालये उभारली, टेस्टिंग लॅब सुरू केली. कोरोना प्रादुर्भाव रोखण्यासाठी ५० लाखांचा निधी दिला आहे. तसेच पालकमंत्र्यांच्या माध्यमातून मनपास १७ कोटींचा निधी नगरविकास खात्याकडून प्राप्त झाला. लोकांचा जीव वाचविण्यासाठी हे सगळे केले आहे. त्याचबरोबर कल्याणचा पत्रीपूल, दुर्गाडी खाडीवरील पुलाच्या दोन लेन नुकत्याच सुरू केलेल्या आहेत.
ते पुढे म्हणाले, कल्याण-दुर्गाडी ते टिटवाळा हा रिंगरोड प्रकल्पाचा टप्पा ७० टक्के पूर्ण झाला आहे. तिसऱ्या टप्प्याच्या निविदेसाठी ८० टक्के भूसंपादनाची प्रक्रिया पूर्ण झाली आहे. लवकरच तिसऱ्या टप्प्याची निविदाही काढली जाणार आहे. याशिवाय मोठागाव ठाकुर्ली ते माणकोली पुलाचे काम पूर्ण केले जात आहे. डोंबिवली एमआयडीसीतील रस्त्यांसाठी ११० कोटींचा निधी आणि कल्याण-डोंबिवलीसाठी १५ कोटीचा निधी मंजूर झाला आहे. ही कामे कोणी केली हे लोकांना चांगले माहिती आहे. लोकांना कामे झाल्याशी मतलब आहे. शिवसेना ही केवळ आणि केवळ विकास कामे करते. पोस्टरबाजी करणाऱ्यांनी ती खुशाल करावी. आम्ही काम ३६५ दिवस काम करतो. ते काम आम्ही करत राहणार, असा निर्धारही शिंदे यांनी व्यक्त केला आहे.
कल्याण-शीळचे काम अंतिम टप्प्यात
कल्याण-शीळ रस्त्याच्या सहापदरी काँक्रिटीकरणाचे काम अंतिम टप्प्यात आहे. कल्याण-शीळ रस्त्यावरील पलावा पुलाचे काम मार्गी लागणार आहे. या भागातील वाहतूक कोंडीचा प्रश्न जवळपास निकाली निघणार आहे, असे खा. शिंदे म्हणाले.
------------