भिवंडी : तौक्ते चक्रीवादळामुळे भिवंडीत सोमवारी सकाळपासून जोरदार सोसाट्याचा वारा व पावसाने हजेरी लावली होती. वादळवारा व पावसामुळे शहरात ठिकठिकाणी झाडे कोसळल्याची, घरांच्या छतांचे पत्रे फुटल्याच्या घटना घडल्या. शहरातील पूर्व भागाला पाणीपुरवठा करणाऱ्या २० दशलक्ष लिटर क्षमतेच्या पाण्याच्या टाकीच्या शिडीचा वरचा भाग तुटून पडल्याची घटना घडली आहे. या दुर्घटनेत कुठलीही हानी झाली नाही. मात्र या पाण्याच्या टाकीची सध्या दयनीय परिस्थिती झाल्याने मनपा प्रशासन या पाण्याच्या टाकीच्या दुरुस्तीकडे जाणीवपूर्वक दुर्लक्ष करीत असल्याने भविष्यात मोठी दुर्घटना घडल्यास त्यास जबाबदार कोण? असा सवाल काँग्रेस नगरसेवक अरुण राऊत यांनी उपस्थित केला आहे.
भिवंडी पालिका कार्यक्षेत्रात आय.जी.एम. रुग्णालयशेजारी पालिकेने सुमारे ४० वर्षांपूर्वी २० दशलक्ष लिटर क्षमतेची पाण्याची टाकी बांधली आहे. या टाकीतून भिवंडी पूर्व विभागातील कार्यक्षेत्रात जलवाहिनीद्वारे पाणीपुरवठा होत असतो. या पाण्याच्या टाकीची निगा व दुरुस्ती न राखल्याने व वेळोवेळी तिची डागडुजी न केल्याने सध्या टाकीची अत्यंत दयनीय स्थिती झाली आहे. टाकीच्या स्लॅब व खांबांना चिरा पडलेल्या असून, काही ठिकाणी स्लॅबचे प्लॅस्टरही निखळून पडले आहे. त्यातच सोमवारी या टाकीची काँक्रीट शिडीचा काही भाग तुटल्याने भविष्यात मोठी दुर्घटना होऊ नये यासाठी आता तरी लवकरात लवकर या टाकीची दुरुस्ती मनपा प्रशासनाने करावी, अशी मागणी नगरसेवक अरुण राऊत यांनी केली आहे.