उल्हासनगर : महापालिका परिवहन बससेवेचा दिवाळी मुहूर्त हुकला असला तरी जानेवारी महिन्यात परिवहन बस सेवा सुरू होण्याचे संकेत उपायुक्त अशोक नाईकवाडे यांनी दिले. ई-बससाठी २ चार्जिंग स्टेशन सज्ज असून केंद्र शासनाकडून येणाऱ्या १०० बसेस नवीन वर्षातच महापालिका परिवहन सेवेत दाखल होणार आहेत.
उल्हासनगर महापालिकेची ठप्प पडलेली परिवहन बस सेवा सुरू करण्यासाठी आयुक्त अजीज शेख यांनी शासनाकडे सतत पाठपुरावा केला. अखेर शासनाच्या स्वच्छ अभियान अंतर्गत निधीतून महापालिकेने एकून २० बसेस खरेदी केल्या. २० पैकी १० लहान व १० मोठ्या आकाराच्या बसेस आहेत. लहान आकाराच्या बसेस शहर अंतर्गत तर मोठ्या आकाराच्या बसेस वातानुकूलित असून त्या लांब पल्याच्या मार्गावर धावणार आहेत. दिवाळीपूर्वी एक बस ट्रायलसाठी शहरात आली होती. त्यावेळी दिवाळीला बस सेवा सुरू होण्याचे संकेत महापालिका प्रशासनाने दिले होते. दरम्यान केंद्र शासनाने १०० इलेक्ट्रिकल बसेसला मंजुरी दिली. त्यामुळे महापालिका परिवहन विभागाच्या ताफ्यात एकून १२० परिवहन बसेस राहणार आहेत. शहाड उड्डाण फुल शेजारी महापालिका भूखंडावर बस आगर व इलेक्ट्रिकल चार्जर स्टेशन उभारण्यात येत आहे. त्यातील दोन ,चार्जिंग स्टेशन सज्ज असल्याची माहिती उपायुक्त अशोक नाईकवाडे यांनी दिली आहे.
महापालिकेकडे परिवहन बस सेवेसाठी सुखसुविधा उपलब्ध नसल्याने, बस सेवा खाजगी ठेकेदारा मार्फत चालविण्यात येणार आहे. मात्र त्यावर महापालिकेचे पूर्णतः नियंत्रण राहणार असल्याची माहिती आयुक्त शेख यांनी दिली. दिवाळी पासून बस सेवेचा लाभ मिळण्याचे संकेत आयुक्त अजीज शेख यांनी सुरवातीला दिले होते. मात्र त्याला नवीन वर्ष उजाडणार असून जानेवारी महिन्यात बसेसचा मुहूर्त साधला जाणार आहे. परिवहन बस सेवा, सिंधू भवन व महापालिका रुग्णालयाचे उदघाटन मुख्यमंत्री एकनाथ शिंदे यांच्या हस्ते होणार असल्याचे बोलले जात असून तिन्ही विकासकामाच्या उदघाटनासाठी मुख्यमंत्री यांची तारीख मिळण्यासाठी राजकीय नेते व महापालिका प्रशासन सक्रिय आहे.
नवीन वर्षात बस धावणार
महापालिका परिवहन बस सेवा जानेवारी महिन्यात सुरू होण्याचे संकेत आयुक्त अजीज शेख यांनी दिले. मुख्यमंत्री यांच्या संमतीनुसार उद्घाटनाची तारीख ठरविली जात आहे.