कल्याण : ओव्हरटेक करताना मंधाता मिश्रा या बाईकस्वाराचा ट्रकच्या चाकाखाली चिरडून जागीच मृत्यू झाल्याची घटना शुक्रवारी (दि. १३) दुपारी २.३०च्या सुमारास पूर्वेतील तिसगाव परिसरात घडली आहे. या प्रकरणी कोळसेवाडी पोलिसांनी ट्रकचालकाला अटक केली आहे.
अपघातानंतर कोळसेवाडी पोलिसांनी घटनास्थळी धाव घेत त्याचा मृतदेह विच्छदेनासाठी पाठविला. अपघाताची घटना सीसीटीव्हीमध्ये कैद झाली आहे. त्यातून दिसून येत आहे की, रिक्षा आणि ट्रकच्या मधून जाताना मंधाता याला अपघात झाला. रिक्षाला ओव्हरटेक करून तो पुढे जाण्याच्या प्रयत्नात होता. त्यात त्याची बाईक घसरली. ट्रकच्या मागच्या चाकाखाली तो सापडून चिरडला गेला. मंधाता डोंबिवली पश्चिमेतील रहिवासी असून, त्याचा पत्नी व दोन मुले असा परिवार आहे. तो एका खासगी कंपनीत कामाला होता. अपघात झाला त्यावेळी तो नक्की उल्हासनगरला कशासाठी जात होता, हे अद्याप समजू शकलेले नाही. या प्रकरणी ट्रकचालक मोतीलाल यादव याच्याविरोधात गुन्हा दाखल केला आहे. त्याला अटक करून न्यायालयात हजर केल्याची माहिती कोळसेवाडीचे पोलीस अधिकारी डी. गोळे यांनी दिली.
------------