मीरारोड - फुकटची केळी बळजबरी घेऊन वर दिव्यांग फेरीवाल्यास मारहाण करणाऱ्या जेसन डिसुझा रा. महावीर बिल्डिंग,चांदमलनगर, भाईंदर पश्चिम ह्या फुकटयास पोलिसांनी पकडले आहे .
भाईंदर पश्चिमेस नेहरू नगर मध्ये राहणारे सद्दाम राजअली हुसेन (२९) हे दिव्यांग असून उपजीविकेसाठी हातगाडीवर केळी विकण्याचा धंदा करतात . फेरीवाला असलेले सद्दाम हे १ मे रोजी भाईंदर पश्चिमेस फाटक मार्गावर हातगाडीवर केळी ठेऊन ती विक्री करत फिरत होते . त्यावेळी जेसन ह्याने गाडीवरील चार केळी सद्दाम यांना न विचारता घेतली . केळं खायला हवे तर एकच घे , चार नको घेऊस असे सद्दाम यांनी सांगितले असता त्याचा राग आलेला जेसन हा गुंडगिरीवर उतरला .
त्याने शिवीगाळी केली असता सद्दाम यांनी शिवीगाळ कशाला करतो म्हटले असता त्याने भर रस्त्यात सद्दाम यांना मारहाण सुरु केली . तसेच त्यांना रस्त्यावर खाली ढकलून पाडले . त्यावेळी काही जागरूक लोकांनी पुढाकार घेऊन सद्दाम याला जेसन च्या तावडीतून वाचवले . या मारहाणीत सद्दाम यांच्या खिशातील ३ हजार रोख गहाळ झाली .
या प्रकरणी भाईंदर पोलिसांनी जेसन याला पकडून त्याच्यावर गुन्हा दाखल केला आहे . या मारहाणीच्या घटनेचा व्हिडीओ व्हायरल झाला असून लोकां मध्ये या मारहाणी बद्दल संताप व्यक्त होत आहे .