ठाणे : उल्हासनगरमध्ये बिनधोकपणे सुरू असलेल्या कल्याण मटका या जुगार अड्ड्यावर ठाणे खंडणीविरोधी पथकाने मंगळवारी दुपारी छापा मारून शब्बीर शेख याच्यासह सहा जणांना अटक केली. या वेळी तीन हजार सहाशे रुपयांच्या रोकडसह जुगाराचे साहित्य पोलिसांनी जप्त केल्याची माहिती सूत्रांनी दिली.
उल्हासनगर क्रमांक ५ मधील जय जनता कॉलनी, मेट्रो बारमागे असलेल्या मोकळ्या परिसरात जुगार अड्डा सुरू असल्याची माहिती पोलीस उपायुक्त लक्ष्मीकांत पाटील यांना मिळाली होती. या माहितीच्या आधारे खंडणीविरोधी पथकाचे वरिष्ठ पोलीस निरीक्षक संजय शिंदे यांच्या मार्गदर्शनाखाली उपनिरीक्षक रमेश कदम यांच्या पथकाने ७ सप्टेंबर रोजी छापा मारला. त्या वेळी अड्डा चालविणाऱ्या शब्बीर याच्यासह जुगार खेळणारे लालू भांगरे (४९), कैलाश वाधवानी (४९), दिनेश वाधवा (२४), मनोज वाघारी (३५), चेतन कोळेकर (२६) आदी सहा जणांना पोलिसांनी ताब्यात घेतले. त्यांच्याकडून जुगाराची सामग्री आणि साडेतीन हजारांची रोकड जप्त करण्यात आली. या प्रकरणी हिललाइन पोलीस ठाण्यात गुन्हा दाखल केला आहे.