कल्याण : पूर्वेतील कोळसेवाडी परिसरातून एका १५ वर्षीय तरुणीला पळवून नेणाऱ्या तरुणाला कोळसेवाडी पोलिसांनी अटक केली आहे. प्रेम वक्ते (वय २०) असे अटक आरोपीचे नाव आहे.
वक्ते हा मूळचा बीड जिल्ह्यातील रहिवासी आहे. तो त्याच्या कल्याणमधील मावशीकडे शिक्षणासाठी आला होता. त्याची मावशी राहत असलेल्या परिसरातील एका १५ वर्षीय मुलीसोबत त्याचे प्रेम जडले होते. तो तिला घेऊन पळून गेला. मुलीच्या पालकांनी कोळसेवाडी पोलीस ठाणे गाठले. फेब्रुवारीत मुलीला पळवून नेल्याप्रकरणी पोलिसांनी अपहरणाचा गुन्हा दाखल केला होता. परंतु, पोलीस मुलीचा शोध घेण्यात कसूर करत असल्याने मुलीच्या पालकांनी उच्च न्यायालयात धाव घेतली. या प्रकरणात न्यायालयाने पोलिसांना मुलाचा शोध १४ जूनच्या आत घेण्याचे आदेश दिले होते. त्यामुळे पोलिसांचे विशेष पथक या तपासासाठी नेमण्यात आले. पोलीस अधिकारी सुरेश डांबरे यांनी तांत्रिक विश्लेषणाच्या आधारे मोबाइल लोकेशन घेत वक्ते याला अटक करून तरुणीची सुटका केली आहे.
-----------