भिवंडी - शहरातील पारनाका परिसरात असलेल्या बाजारपेठेमधील एका इमारतीच्या तळमजल्यावर भीषण आग लागल्याची घटना रविवारी सकाळी घडली. या भीषण आगीत इमारतीमधील कपड्यांची चार दुकाने जळून खाक झाली आहेत. मात्र, यामध्ये कोणतीही जीवितहानी झाली नाही.
भिवंडीत आगीचे सत्र सुरूच असून, रविवारी सकाळच्या सुमारास पारनाका भागातील बाजारपेठेत असलेल्या इमारतीच्या तळमजल्यावरील एका दुकानात आग लागली होती. मात्र, सकाळच्या सुमारास इतर दुकाने बंद असल्याने ही आग जवळच्या इतरही दुकानांपर्यंत पसरली आणि चारही दुकाने आगीच्या भक्षस्थानी पडली. दुसरीकडे या भीषण आगीमुळे इमरतीत राहणाऱ्या रहिवाशांमध्ये भीतीचे वातावरण पसरले होते.
माहिती मिळताच घटनास्थळी अग्निशमन दलाच्या दोन गाड्या दाखल होऊन एका तासात आग आटोक्यात आली. मात्र, कपड्यांच्या दुकानाला लागलेल्या आगीत कपडे व दुकाने जळून खाक झाली असून, ही आग शॉर्टसर्किटने लागल्याचे सांगण्यात येत आहे.