ठाणे: औरंगाबादमध्ये अवघ्या १६ दिवसांमध्ये ३०० खाटांचे कोविड केअर सेंटर उभारणारे कार्यकारी अभियंता भूषण हर्षे हे आता ठाण्यात बदलीने रुजू झाले आहेत. महाराष्ट्र औद्योगिक विकास महामंडळाच्या ठाणे विभाग क्रमांक एकच्या कार्यकारी अभियंतापदी त्यांची राज्य शासनाने नुकतीच नियुक्ती केली आहे.
सरळ सेवा पद्धतीने जुलै २०१५ मध्ये महाराष्ट्र औद्योगिक विकास मंडळात त्यांची नियुक्ती झाली. महामंडळाच्या लातूर विभागात २०१५च्या दुष्काळी परिस्थितीमध्ये जिल्हा प्रशासनाच्या समन्वयाने उद्योगांचा पाणी पुरवठा सुस्थितीत ठेवण्यासाठी ते प्रयत्नशील होते. जून २०१६ ते २०१८ यादरम्यान धुळे विभागांतर्गत जळगाव, धुळे आणि नंदुरबार जिल्ह्यातील उद्योग विकासासाठी तसेच पायाभूत सुविधा पुरविण्यासाठी त्यांनी विशेष प्रयत्न केले. पुढे २०१८ ते जुलै २०२१पर्यंत ते औरंगाबाद येथे कार्यरत होते. याच काळात औरंगाबाद येथे नवीन ७२ दशलक्ष घनमीटर इतकी प्रतिदिन पाणी पुरवठा योजना त्यांनी कार्यान्वित केली. याशिवाय, ३१ मेट्रिक टन प्रतिदिन क्षमतेचे अघातक कचरा संकलन, उपचार विल्हेवाट आणि व्यवस्थापन सयंत्रणा कार्यान्वित करण्यासाठी त्यांनी विशेष प्रयत्न केले. कोविड काळात महामंडळातर्फे ५० टक्के ऑक्सिजनची व्यवस्था असलेले ३०० खाटांचे सुसज्ज असे कोविड केअर सेंटर वैद्यकीय उपकरणांसह तयार करून त्यांनी ते महापालिकेला सुपूर्द केले. अल्पावधीत रुग्णालयाची उभारणी केल्याबद्दल उद्योगमंत्री देसाई यांनीही त्यांचे विशेष कौतुक केले होते. ठाणे विभागातील वागळे इस्टेट, तारापूर आणि अंधेरीचे कार्यक्षेत्र त्यांच्याकडे असून, अंधेरीतील एसआरए प्रकल्प काही दिवसांमध्ये मार्गी लावण्याचा मनोदय त्यांनी ‘लोकमत’जवळ व्यक्त केला.
...........................