ठाणे : बारामती अॅग्रो कंपनी आणि आमदार रोहित पवार यांच्या वतीने ठाणे महानगरपालिकेला राष्ट्रवादीचे ठाणे अध्यक्ष आनंद परांजपे यांच्या हस्ते आठ ऑक्सिजन कॉन्सन्ट्रेटर गुरुवारी प्रदान करण्यात आले. यावेळी ठामपाचे विरोधी पक्षनेते अश्रफ शानू पठाण हे उपस्थित होते.
कोरोनाबाधित रुग्णांसाठी सुरुवातीच्या काळात ऑक्सिजन कॉन्सन्ट्रेटर हे उपकरण प्रभावी ठरते. या साधनात इलेक्ट्रिक प्रणालीवर हवा आणि पाण्याद्वारे ऑक्सिजनची निर्मिती केली जाते. एकाच वेळी पाच लीटर ऑक्सिजन सांभाळण्याची क्षमता असल्याने याचा कोरोना रुग्णांना चांगला लाभ होतो. यात पाच लीटरचे तीन आणि सात लीटरचे पाच असे आठ ऑक्सिजन कॉन्सन्ट्रेटर ठामपाचे अतिरिक्त आयुक्त गणेश देशमुख यांच्याकडे परांजपे यांनी सुपूर्द केले.
यावेळी परांजपे यांनी बारामती अॅग्रोने राज्यात ५०० ऑक्सिजन कॉन्सन्ट्रेटर दिले आहेत. सध्याची अवस्था पाहता पवार यांनी आणखी ऑक्सिजन कॉन्सन्ट्रेटर ठाण्याला द्यावेत, अशी मागणी आपण करणार असल्याचे सांगितले.
यावेळी परिवहन समिती सदस्य नितीन पाटील, उपायुक्त संदीप माळवी, विश्वनाथ केळकर, वैद्यकीय अधिकारी डॉ. देवगीकर, डॉ. खुशबू टावरी, राष्ट्रवादी काँग्रेसचे युवा अध्यक्ष विक्रम खामकर, सरचिटणीस रवींद्र पालव ठाणे विधानसभा अध्यक्ष विजय भामरे, उथळसर ब्लॉक अध्यक्ष समीर पेंढारे, रायलादेवी ब्लॉक अध्यक्ष रत्नेश दुबे ,कार्यालयीन सहसचिव संकेत नारणे आदी उपस्थित होते.