लोकमत न्यूज नेटवर्क
डोंबिवली : भाऊ-बहिणीच्या नात्याचा सण असलेला रक्षाबंधन रविवारी सर्वत्र साजरा होणार आहे. त्या पार्श्वभूमीवर शनिवारी सायंकाळी डोंबिवलीत नागरिकांची खरेदीसाठी झुंबड उडाल्याचे पाहायला मिळाले. त्यामुळे शहरातील मुख्य रस्ते तुडुंब भरले होते.
पूर्वेतील फडके रोड, उर्सेकर वाडी, राथ रोड, नेहरू रोड, रामनगर, चिमणी गल्ली तसेच पश्चिमेला घनश्याम गुप्ते रोड, दीनदयाळ रोड, महात्मा फुले रोड, सुभाष रोड येथील दुकानांमध्ये मोठ्या प्रमाणावर गर्दी दिसून आली. निरनिराळ्या आकाराच्या, रंगीबिरंगी राख्यांनी दुकाने सजली आहेत. अगदी दोन ते तीन रुपयापासून शंभर ते दीडशे रुपयापर्यंतच्या राख्या विक्रीसाठी ठेवण्यात आल्या होत्या. आपल्या भावाची आवड-निवड लक्षात घेऊन महिला-मुली राख्या खरेदी करताना पाहायला मिळाल्या. त्याचबरोबर कपडे, सौंदर्य प्रसाधने, मेहंदी, आभूषणे, मिठाईची तसेच भेटवस्तूंची जोरदार खरेदी करण्यात आली.
-------------