ठाणे : शहरातील कोरोना प्रतिबंधक लसीकरण मोहिमेची व्यापकता वाढविण्यासाठी ठाणे महापालिकेतर्फे आणि रेमंड कंपनी यांच्या सहकार्याने १८ ते ४४ वयोगटासाठी सुरू करण्यात आलेल्या ‘ड्राइव्ह इन’ लसीकरणाचा प्रारंभ शुक्रवारी राज्याचे नगरविकास मंत्री व जिल्ह्याचे पालकमंत्री एकनाथ शिंदे यांच्या हस्ते झाला.
याप्रसंगी महापौर नरेश म्हस्के, उपमहापौर पल्लवी कदम, स्थायी समितीचे सभापती संजय भोईर, सभागृह नेता अशोक वैती, ठाणे महापालिका आयुक्त डॉ. विपिन शर्मा, आरोग्य परिरक्षण व वैद्यकीय साहाय्य समिती अध्यक्षा निशा पाटील, शिवसेना गटनेता दिलीप बारटक्के, राष्ट्रवादी गटनेता नजीब मुल्ला, नगरसेविका कल्पना पाटील, रेमंड ग्रुपचे चेअरमन आणि व्यवस्थापकीय संचालक गौतम सिंघानिया, उपायुक्त संदीप माळवी, आदी उपस्थित होते.
ठाणे महापालिकेतर्फे केंद्र सरकारच्या मार्गदर्शक सूचनेनुसार शहरातील १८ ते ४४ वयोगटांतील नागरिकांचे लसीकरण सुरू करण्यात आले आहे. परंतु, लसीकरणाच्या व्यापकता वाढावी, यासाठी रेमंड कंपनी येथे शुक्रवारपासून ‘ड्राइव्ह इन’ लसीकरण सुरू करण्यात आले. शुक्रवारी पहिल्याच दिवशी कोविशिल्डचे ३०० डोस देण्यात आले.
ऑनलाइन नोंदणी बंधनकारक
‘ड्राइव्ह इन’ लसीकरणासाठी ऑनलाइन नोंदणी करणे बंधनकारक आहे. नोंदणी केलेल्या १८ ते ४४ वयोगटातील नागरिकांनाच लस देण्यात येत आहे. तसेच लसीकरणासाठी येताना सोबत चालक आणि आणखी एक काळजीवाहक म्हणून एक व्यक्ती सोबत असणे आवश्यक आहे. या केंद्रावर सकाळी ११ ते ४ या वेळेत लसीकरण सुरू राहणार असून, नागरिकांनी त्याचा लाभ घ्यावा, असे आवाहन ठाणे महापालिकेने केले आहे.
---------------------