सदानंद नाईक
लोकमत न्यूज नेटवर्क
उल्हासनगर : महापालिका उपायुक्तांना सोपविलेल्या विभागात आयुक्तांनी भेदभाव केल्याचा आरोप उपमहापौर भगवान भालेराव यांनी केला असून, उपायुक्त अशोक नाईकवाडे व प्रियंका राजपूत यांच्याकडील काही विभाग काढण्याची लेखी मागणी भालेराव यांनी केली आहे. जर ते विभाग काढून घेतले नाही, तर दालनाबाहेर उपोषण करण्याचा इशाराही भालेराव यांनी केला आहे. या प्रकाराने महापालिकेत आयुक्त विरुद्ध उपमहापौर असा सामना रंगल्याची चर्चा आहे.
उल्हासनगर महापालिकेला प्रथमच अतिरिक आयुक्त म्हणून करुणा जुईकर तर अशोक नाईकवाडे, मदन सोंडे, प्रियंका राजपूत व सुभाष जाधव असे चार उपायुक्त मिळाले. उपायुक्त दर्जाचे चार अधिकारी मिळाल्याने महापालिकेत पारदर्शक व चांगले काम होणार असे वाटत होते. मात्र, उपमहापौर भगवान भालेराव यांनी उपायुक्त यांच्याकडे सोपविलेल्या विभागात आयुक्तांनी दुजाभाव करून काही उपायुक्तांना चांगले तर काहींना कमी दर्जाचे विभाग दिल्याचा आरोप केला आहे. उपायुक्त प्रियंका राजपूत यांच्याकडील शिक्षण विभाग व महिला बालकल्याण विभाग तसेच उपायुक्त अशोक नाईकवाडे यांच्याकडील सार्वजनिक बांधकाम विभाग व भांडार विभाग काढून घेण्याची लेखी मागणी त्यांनी आयुक्तांकडे केली. २९ जुलैच्या दुपारपर्यंत सोपविलेला विभाग काढला नाही, तर उपमहापौर दालनाबाहेर उपोषण करण्याचा इशारा भालेराव यांनी आयुक्तांना दिला आहे.
महापालिका उपायुक्तांकडील सोपविलेल्या विभागावरून आयुक्त डॉ.राजा दयानिधी व उपमहापौर भगवान भालेराव एकमेकांविरोधात उभे ठाकल्याचे चित्र शहरात निर्माण झाले. कोरोना महामारीच्या काळात महापालिकेत कार्यरत असलेले एकमेव उपायुक्त मदन सोंडे यांनी चमकदार कामगिरी केली. मात्र, त्यांना बाजूला सारून कमी महत्त्वाचे विभाग दिल्याचा आरोप भालेराव यांनी केला. तसेच विभाग सोपविताना वरिष्ठ श्रेणीचा विचार केला नाही, असेही ते म्हणाले.
------------
हे तर प्रशासकीय कामकाज- आयुक्त डॉ. दयानिधी
महापालिका सेवेत दाखल झालेल्या अधिकाऱ्यांना विविध विभागांचा पदभार सोपविणे, हे प्रशासकीय काम आहे. उपमहापौर भगवान भालेराव यांचे उपोषण व उपायुक्तांकडे सोपविल्याबाबतचे पत्र मिळाले असून नियमानुसार काय कारवाई होते. त्यानुसार कारवाई करणार असल्याची प्रतिक्रिया आयुक्त. डॉ. राजा दयानिधी यांनी दिली.