लोकमत न्यूज नेटवर्क
ठाणे : जिल्ह्यातील सहा मनपा, उद्याेग, कारखाने आणि गावपाड्यांना पाणीपुरवठा करणारे बारवी धरण गेल्या वर्षी १ सप्टेंबरला १०० टक्के भरले होते. जिल्ह्यात यंदा पावसाने कहर करून जनजीवन विस्कळीत करूनही यंदा मात्र बारवी धरण अजूनपर्यंतही भरले नसून, अवघा ९५ टक्के पाणीसाठा झाल्याचे वास्तव उघडकीस आले आहे.
शहरांसह गावखेड्यांतील रहिवासी आणि शेतकऱ्यांना जुलैतील अतिवृष्टीचा जबरदस्त फटका बसला आहे. नदी, नाले दुथडी भरून वाहले. यांच्या पुराचे पाणी खाडीला भरती असल्यामुळे निवासी भागात, घरांमध्ये शिरल्याने रहिवाशांना घरांच्या छतांवर रात्रंदिवस बसावे लागले आहे. यादरम्यान मात्र बारावी धरणाच्या पाणलोटात कमी पाऊस पडल्यामुळे त्यात १०० टक्के पाणीसाठा तयार झाला नाही. यामुळे १ सप्टेंबरपूर्वी धरण भरण्याचा अंदाज मात्र फोल ठरला आहे.
मुसळधार पावसाचा अंदाज असतानाही तो बहुधा गेल्या काही दिवसांपासून फोल ठरत आहे. त्यामुळे बारवी धरणात आज रोजी ९५ टक्के पाणीसाठा आहे. या धरणाची पाणीपातळी अवघी ७२.०१ मीटर तयार झाली. गेल्या वर्षी आजच्या दिवशी ७२.५७ मीटर पाणीपातळी होती. गेल्या वर्षी ३३७.६५ घनमीटर पाणीसाठा असलेल्या या बारवी धरणात शनिवारी ३१८.३७ दशलक्ष घनमीटर पाणीसाठा झाला आहे.
या धरणात गेल्या सरासरी २२६६ मिमी पाऊस पडला होता. मात्र, यंदा सरासरी १९८४ मिमी पाऊस पडला आहे. दस्तुरखुद्द धरणात सरासरी अवघा १९७८ मिमी पाऊस पडला, तर या धरणाच्या पाणलोटापैकी खानिवरे या पाणलोटात सरासरी २७२८ मिमी, कान्होळला २०९५ मिमी, पाटगावला २०२३ मिमी आणि ठाकूरवाडी या पाणलोटात २३४२ मिमी पाऊस पडलेला आहे. या धरणात गेल्या पाच वर्षांतील सरासरी २२०.६१ दशलक्ष घनमीटर मीटर पाणीसाठा होता. यामध्ये २०१६ ला २३३.०७ दशलक्ष घनमीटर, २०१७ ला २२९.९० आणि २०१८ व २०१९ या दोन्ही वर्षी २२९.८७ दशलक्ष घनमीटर पाणीसाठा होता.