भिवंडी : काँग्रेसचे प्रदेशाध्यक्ष नाना पटोले यांनी गुरुवारी सायंकाळी उशिराने दयानंद चोरघे यांची पक्षाच्या ठाणे जिल्हाध्यक्षपदी नियुक्ती केली आहे.
काँग्रेसच्या राष्ट्रीय अध्यक्षा सोनिया गांधी यांच्या मान्यतेने शुक्रवारी राष्ट्रीय महासचिव वेणूगोपाल यांनी महाराष्ट्रातील १४ नवे जिल्हाध्यक्ष जाहीर केले. यावेळी चोरघे यांच्यावर ठाणे ग्रामीण जिल्हाध्यक्ष पदाची जबाबदारी सोपविली आहे. चोरघे हे महसूलमंत्री बाळासाहेब थोरात व प्रदेश अध्यक्ष नानाभाऊ पटोले यांचे कट्टर समर्थक असून, त्यांनी भाजपच्या प्रदेश सचिवपदाचा त्याग करून काँग्रेसमध्ये घरवापसी केली होती. तेव्हापासून तेच अध्यक्ष होतील, अशी चर्चा होती. चोरघे यांनी सामाजिक भान जपून आपल्या डी. वाय. फाऊंडेशन या समाजसेवी संस्थेच्या माध्यमातून विविध सामाजिक उपक्रम राबवले आहेत. कोरोना काळात त्यांनी अनेकांना मदतीचा हात देऊन गरीब व गरजूंना आर्थिक मदत व अन्नधान्य पुरवून आधार दिला आहे.
काँग्रेस संघटन अधिक मजबूत करण्यासाठी मला अध्यक्षपदाची जबाबदारी दिली आहे, एक बूथ दहा युथ ही संकल्पना घेऊन मी काम करणार असून, प्रदेश अध्यक्ष नानाभाऊ पटोले, महसूलमंत्री बाळासाहेब थोरात यांच्या मार्गदर्शनाखाली आणि जिल्ह्यातील सर्व ब्लॉक अध्यक्ष, प्रमुख नेते यांना सोबत घेऊन मी पक्ष संघटन वाढविण्यासाठी सदैव प्रयत्नशील राहणार आहे. आगामी निवडणुकांमध्ये काँग्रेसचे जास्तीत जास्त उमेदवार निवडून आणण्यासाठी प्रयत्न करणार आहे, अशी प्रतिक्रिया त्यांनी दिली.