ठाणे : महापालिका आयुक्त डॉ. विपिन शर्मा यांनी बुधवारी ठाणे ग्लोबल हॅास्पिटलला भेट देऊन तेथील मृत्युदर कमी करण्यासाठी उपाययोजना करण्याच्या सूचना करून आवश्यक त्या सुविधा निर्माण करण्यासाठी तातडीने पावले उचलण्याचे आदेश दिले. तसेच तिसऱ्या लाटेत लहान मुलांसाठी १०० खाटांचा स्वतंत्र कक्ष निर्माण करून तज्ज्ञ डॉक्टर नेमणे, आवश्यक असलेल्या औषधांची खरेदी करणे, ॲाक्सिजनच्या पुरवठ्याची तयारी करण्याच्या सूचनाही दिल्या.याठिकाणी १०० बेडची व्यवस्था करण्यात येत असून त्यामध्ये ३ ते १४ वयोगटातील मुलांचे नियोजन केले जाणार असल्याचेही आयुक्तांनी स्पष्ट केले आहे.
पार्किंग प्लाझा येथील १०० बेडमध्ये ५० ऑक्सिजनचे, २५ आयसीयु आणि २५ आयसीयु व्हेंन्टिलेटरचे बेड असणार आहेत. याशिवाय लहान मुले ही एकटी राहू शकत नसल्याने त्यांच्याबरोबर आई, किंवा वडील राहू शकतील अशा पद्धतीचे मोठे बेड उपलब्ध केले जाणार असल्याचेही त्यांनी स्पष्ट केले.
दरम्यान कोविड रुग्णांचा मृत्युदर कमी करण्याबाबत ठाणे जिल्ह्याचे पालकमंत्री एकनाथ शिंदे यांनी यापूर्वीच आवश्यक त्या उपाययोजना करण्याच्या सूचना दिल्या होत्या. त्या पार्श्वभूमीवर महापालिका आयुक्तांनी सकाळी ठाणे ग्वोबल हॅास्पिटलला भेट दिली. यावेळी अतिरिक्त आयुक्त गणेश देशमुख, उपायुक्त संदीप माळवी, अशोक बुरपल्ले, विश्वनाथ केळकर, माहिती व जनसंपर्क अधिकारी महेश राजदेरकर, ग्लोबल हॅास्पिटलचे वैद्यकीय अधीक्षक डॉ. अनिरुद्ध माळगावकर, आदी अधिकारी उपस्थित होते.
यावेळी महापालिका आयुक्तांनी आयसीयू कक्षामध्ये तज्ज्ञ डॅाक्टरांची आवश्यकता असल्यास ते तातडीने नेमण्याच्या सूचना करून व्हेंटिलेटरवर असणाऱ्या रुग्णांची विशेष काळजी घेण्याचे आदेश दिले.